Ерөнхий сайдад нэр дэвшигчид урьдчилсан байдлаар тодроод байна

- УИХ дахь АН-ын бүлгийн хуралдаан завсарлалаа -

УИХ-ын гишүүн Р.Бурмаагийн мэдээлж буйгаар АН-ын бүлэг Ерөнхий сайдад УИХ-ын гишүүн Р.Амаржаргал, Ч.Сайханбилэг, Д.Ганбат нарыг нэр дэвшүүлжээ.

АН-ын бүлгийн дэд дарга С.Одонтуяа энэ талаар мэдээлэл хийлээ. Тэрбээр ярихдаа “13.00 цагаас АН-ын бүлгийн хурал үргэлжилнэ.

Үдээс хойш манай намынхан шийдэж Ерөнхий сайдаа тодруулна.​

Үдээс хойших хуралдаанаар гурван нэр дэвшигч өөрсдийн мөрийн хөтөлбөрөө танилцуулна. Танилцуулсны дараагаар шийдвэрээ гаргана.” гэлээ.

Нэр дэвшигчдийн танилцуулга:

Монгол Улсын Их Хурлын гишүүн, Монгол Улсын сайд Ч.Сайханбилэг

Ч.Сайханбилэг 1969 онд Дорнод аймгийн Сүмбэр суманд төрсөн. 1986 онд Нийслэлийн 10 жилийн 45 дугаар дунд сургууль, 1991 онд Москва хотын Хүмүүнлэгийн их сургуулийг түүхийн багш мэргэжлээр, 1995 онд Монгол Улсын Их Сургуулийг хуульч мэргэжлээр, 2002 онд АНУ-ын Вашингтон хотын Жорж Вашингтоны их сургуулийг тус тус төгссөн. Хууль зүйн ухааны магистр.

Тэрбээр 1991 онд Монголын Залуучуудын Холбооноос ажлын гараагаа эхэлж,  1992-1997 онд Монголын Залуучуудын Холбоонд Нарийн бичгийн дарга болжээ. Улмаар 1996-2000 онд Монгол Улсын Их Хурлын гишүүн болсон бөгөөд 1997-2002 онд Монголын Залуучуудын Холбооны Ерөнхийлөгч, 1998-1999 онд Монгол Улсын Засгийн газрын гишүүн, Гэгээрлийн сайд, 2002-2004 онд Хууль зүйн Е&Т товчооны захирал, 2004-2008 онд Мэдээлэл, харилцаа холбоо, технологийн газрын дарга, 2004 онд Монгол Улсын Засгийн газрын Хэвлэл мэдээллийн албаны дарга зэрэг хариуцлагатай алба хашиж байв.

2008 оны УИХ-ын ээлжит сонгуулиар Монгол Улсын Их Хурлын гишүүн болж,  УИХ дахь Ардчилсан намын бүлгийн даргаар сонгогдон ажилласан бөгөөд 2012 оны УИХ-ын зургаа  дахь удаагийн сонгуулиар Монгол Улсын Их Хуралд дахин сонгогдож, Монгол Улсын Засгийн газрын гишүүн-Монгол Улсын сайд, Засгийн газрын Хэрэг эрхлэх газрын даргаар томилогдон ажиллаж байна.

АН-ын Үндэсний зөвлөлдөх хорооны гишүүн тэрбээр 2005 онд Засгийн газрын хүндэт өргөмжлөл, 2006 онд Алтангадас одон, 2011 онд Хөдөлмөрийн гавьяаны улаан тугийн одонгоор тус тус шагнуулсан.  Англи,  орос хэлтэй.

Монгол Улсын Их Хурлын гишүүн, Хууль зүйн байнгын хорооны дарга Д.Ганбат

Д.Ганбат 1979 онд Баянхонгор аймгийн 10 жилийн дунд сургууль, 1984-1989 онд ЗХУ-ын Киев хотод Цэргийн инженерийн дээд сургууль, 1984-1989 онд Украйны Киев хотын ВГЧУ, 1996-1999 онд МУИС-ийн Хууль зүйн дээд сургуулийг тус тус төгссөн. Инженер, механикч, орчуулагч,  эрх зүйч мэргэжилтэй.

Тэрбээр 1982 онд Ардын армид салаа салбарын захирагч, 1989-1992 онд Монгол, Оросын хамтарсан “Баянбулаг” компанид дэд захирал, 1996-1999 онд Түүх, соёлын дурсгал сэргээх газрын дарга, 1999-2004 онд “Техник Импорт” ХКомпаний Төлөөлөн удирдах зөвлөлийн дарга, 2004-2012 онд “Техник Импорт” ХКомпаний ерөнхий захирлаар ажиллаж байсан.

Д.Ганбат 2012 онд УИХ-ын зургаа дахь удаагийн сонгуулиар Монгол Улсын Их Хурлын гишүүнээр сонгогдон ажиллаж байна. УИХ-ын Хууль зүйн байнгын хорооны даргаар ажилладаг.

2010 онд Алтангадас одонгоор шагнагдсан. Англи, орос хэлтэй.

Монгол Улсын Их Хурлын гишүүн Р.Амаржаргал

Р.Амаржаргал  1978 онд нийслэлийн 10 жилийн 14 дүгээр дунд сургууль, 1982 онд ЗХУ-ын Москва хотын Улс Ардын Аж Ахуйн дээд сургууль, 1995 онд Их Британийн Брэд Форд их сургууль тус тус төгссөн. Эдийн засагч мэргэжилтэй. Магистрын  зэрэгтэй.

Тэрбээр 1982-1983 онд Монголын Үйлдвэрчний Эвлэлийн Төв зөвлөлд зааварлагч,1983-1990 онд Цэргийн нэгдсэн дээд сургуульд,  1990-1991  онд Техникийн  Их Сургуульд багш, 1991-1996 онд Эдийн засгийн коллежийн захирлаар ажиллаж байсан. Түүнчлэн 1996-2000 онд Монгол Улсын Их Хурлын гишүүн, 1998-1999 онд Монгол Улсын Засгийн газрын гишүүн, Гадаад хэргийн сайд

1999-2000 онд Монгол Улсын Ерөнхий сайд, 2000-2004 онд *Амаржаргал* сангийн тэргүүнээр тус тус ажиллаж байв. Улмаар 2004 оноос эхлэн УИХ-ын гишүүнээр дараалан 3 дах удаагаа сонгогдоод байна.

Р.Амаржаргал 1994 онд Алтангадас одон, 2006 онд Их Монгол Улс байгуулагдсаны 800 жилийн ойн хүндэт медаль, 2007 онд Хөдөлмөрийн гавьяаны улаан тугийн одон, 2009 онд Сүхбаатарын одонгоор тус тус шагнагдсан. Орос, англи хэлтэй.

Эх сурвалжийг: ikon.mn