Тегераны баян хүүхдүүд

Ираны улс төр, нийгмийн байдал тун хэцүү байгаа талаар хэвлэл мэдээллийн хэрэгслүүд байнга шахуу мэдээлдэг юм. Тэгтэл харин ч эсрэгээрээ сайхан байгаа талаар Rich Kids of Tehran буюу Тегераны баян хүүхдүүд хэмээх Инстаграмын хуудас өгүүлж байна. Эл хуудсын гишүүд нь 20-30 насны залуус байх бөгөөд хэдэнтээ дайн тулааны хөлд нэрвэгдэж байсан Тегеранд амьдрал сайхан байгааг баярхан харуулахад зорьжээ. Мэдээж тэд баян айлын хүүхдүүд аж. Залуус өглөө, өдөр, оройдоо хэрхэн тансаглаж, найрлаж байгаагаа гэрэл зургаар баримтжуулан Инстаграмдаа оруулдаг. Эртний Персийн хаад шиг аяглаж, үнэтэй тансаг машин, бренд, загварын хувцас, үнэтэй бугуйн цаг, үнэт эдлэл шинээр авснаа гайхуулж байх юм. Газар дээр нь очихоос нааш үнэмшихийн аргагүй гайхалтай тансаг амьдралыг тус хуудаснаас л харж болж байна.

Инстаграм дахь Тегераны баян хүүхдүүд хуудсыг өнгөрсөн сарын 13-ны өдөр нээснээс хойш өнөөдрийн байдлаар 55000 дагалдагчтай болжээ. Хуудасны зорилго нь тансаглалаараа баярхах ч гэлээ цаад учир нь дэлхий нийтийн мэддэггүй Иран улсын сайхан талыг харуулж, хар бараан мэдээлэлд няцаалт өгөх юм гэж админ нь тодорхойлсон байгаа юм.