Найман хөлтэй ишиг төржээ

Хроватын зүүн хойд нутагт орших нэгэн фермийн аж ахуйд найман хөлтэй ишиг төржээ. Олон улсад шуугиан дэгдээгээд байгаа ишгийг дэлхийн хэвлэл мэдээллийн агентлагууд “Оctogoat” буюу “Наймаалжин ямаа” гэж нэрлэж буй юм.

Кутжево дахь фермийн эзэн Зоран Папаричийн Сарка хэмээх ямаанаас төрсөн энэ ишиг нь найман хөлтэйгөөс гадна эр, эм үржлийн эрхтэнтэй төрсөн байх юм. Папаричийн ярьж буйгаар илүү хөлтэй төрсөн нь хоёр ихэр ураг хэвлийд байхдаа нэгдэж, хүнээр бол “Сиамын ихэр” болсон гэсэн үг бололтой.

Нутгийн иргэдийн тал нь эл явдлыг муу ёр гэж үзэж байгаа бол Папарич тэргүүтэй тал хувь нь байгалийн гайхамшиг гэж хүлээн авч байгаа аж. Фермийн эзэн ч ишгийг амьд үлдэж чадвал тэжээнэ гэдгээ нуулгүй ярьсан байна.