Д.Зоригтыг огцруулах үндэслэл дахин гарч ирэв

Шатахуун, түлшний хомсдол холбог­дох агентлагыг татан буулгах, дарга нарыг нь огцруулах хэмжээнд хүрсэн гэж өнгөрөгч мягмар гаригийн Аюулгүй бай­дал, гадаад бодлогын байнгын хорооны хуралдаанд яригдлаа. Тус хуралдаанд Газ­рын тосны Хэрэг эрхлэх газрын дарга Ж.Амарсайхан болон Эрдэс бая­лаг, эрчим хүчний яам /ЭБЭХЯ/-ны Тө­рийн нарийн  бичгийн дарга тэргүүтэй хол­богдох газруудын мэргэжилтнүүд оролц­сон бөгөөд тэд энэ удаад нэлээд шүүмжлэл сонсов. Энэ талаар УИХ-ын гишүүн З.Энхболд “Танай агентлаг шинэ зүйл ер хийгээгүй, өөрөөр хэлбэл байрнаасаа огт хөдлөөгүй байна. Та нар ингэхэд ажлаа хийж чадаж байгаа юм уу, Ер нь танай газрыг бараг татан буулгах хэрэгтэй байх аа. Яагаад гээч.  Дандаа “ниргэсэн хойно нь хашгирав” гэгч болдог. 2008 оны зун яасан. Бас л бензиний хомсдол нүүрлэсэн. Тэгээд эцэст нь алдагдлыг нь хэн ч төлөөгүй. Өнгөрсөн арванхоёрдугаар сард асуу­дал яригдаж байхад урьдчилан сэр­гийлэх арга хэмжээ аваагүй.  20 жил өнгөрөхөд танай агентлагийн ажил яг хэвээрээ л яваад байна. Нөгөө л булан­гийн орнуудаас нефть авна, нөгөө л Тяньжингээс  ачуулна гэдгээ өнөөдөр ярьж л сууна. Танай бодлогыг ер ойл­гохгүй л байгаа. Түүхий нефтийн үйлдвэр бариулахгүй гэсэн бодлого бариад байна уу, нефтийн үйлдвэр ашиггүй гэж та бүхэн 20 жил ярьсан. Өнөөдөр автобус явахгүй, комбайн, трактор ажиллахгүй болохоор түүнээс илүү алдагдалд орно.  Танай газар байлаа гээд улс оронд ямар ач холбогдолтой болж байна вэ” хэмээн шүүмжиллээ.

Мөн “Гал унтраах байдлаар асууд­лыг хэлэлцэх нь ач холбогдолгүй, Зас­гийн газрын бодлогын байгууллагууд байж сайд, даргагүй бензин гуйгаад, бен­зиний наймаа хийгээд явж байгааг юу гэх вэ” зэрэг шүүмж, асуулт араас нь үргэлжлэв. Газрын тосны газрын Хэрэг эрхлэх газрын дарга Ж.Амарсайхан “Өөр нийлүүлэгчээс нефть худалдан авах боломжийг судалж байгаа. Зохио­мол хомсдол бий болж байна. Байдал удахгүй хэвийн хэмжээнд очно. Нефть боловс­руулах үйлдвэр байгуулах ажлыг судалж байгаа” гэх утгатай тайлбарыг хийсэн нь “20 жил судлаад бардаггүй асуудал бай­даг юм уу” хэмээх шүүмжлэлийг мөн да­гуулав.

Хэлэлцүүлгийн үеэр дотоодын неф­тийн үйлдвэр байгуулахад анхаарах, шата­хууны нөөц бүрдүүлэх, зөвхөн нэг газраас хараат бус шатахуун авах өөр эх сурвалжтай болох талаас нь анхаарах та­лаас нь бодлого, УИХ-ын тогтоолын тө­сөл гаргах тухай байнгын хорооны дар­га Я.Батсуурь санал гаргаж, хэд хэдэн гишүүн дэмжиж санал гаргасныг З.Энхболд “УИХ чавганц шиг болжээ” гэх хатуу үгийг нөхөддөө хэлэхэд хүргэв.

Ийнхүү хэлэх болсон учир нь 2008 оны есдүгээр сард яг ийм чиглэ­­лийн үүрэг даалгавар байнгын хороо­­ны тогтоолд дурдагдсан бөгөөд бү­тэн гурван жил өнгөрөөд байхад огт хэрэгжээгүйтэй холбоотой гэнэ. Ийн­хүү өмнө нь ОХУ-ын Засгийн газар өн­­­гөр­­сөн оны арванхоёрдугаар сард л ша­­тахууныг хязгаарлаж эхлэх тухай ярь­­­сан, дөрөвдүгээр сард үнэ нь нэ­мэгдсэн зэрэг урьдчилсан нөхцөл үүс­сэн байхад урьдчилан сэргийлэх арга хэм­жээ авч чадаагүй нь харьяалах яам, агент­лагын удирдлагын хариуцлагын хэмжээнд яригдах нь зүйтэй гэх сана­лыг гишүүд гаргасан аж. Эдгээрт “Хэрэг эрхлэх  газрыг татан буулгаж, ЭБЭХ-ний сайд Д.Зоригт, агентлагийн дар­­га Ж.Амарсайхан нарыг огцруулах хэ­рэгтэй” гэх саналууд дайгдав. Ийнхүү ху­ралдаан өндөрлөхөд оролцогчид тан­химаас “Д.Зоригт сайдыг огцруулах асуу­дал дахиад шинээр босч ирэх нь дээ” гэж ярилцсаар тарсан юм.