Мөрөөдлийнхөө ажилд яаж орох вэ

Амьдралд дөнгөж хөл тавьж буй залуу охиддоо  мөрөөдлийнхөө ажлыг “шүүрч” авахын тулд юу хийх ёстойг зөвлөж байна.

Жүжигчин: Хэрэв чи авъяаслаг нэртэй жүжигчин болохоор сэтгэл шулуудан сурч байгаа бол шалгалтууд дээрээ бусдаас онцгойрох хэрэгтэй. Багш нар чинь чамайг өөр өөрсдийнхөөрөө үнэлж байгаа. Харин дараагийн шалгалт, эсвэл бэлтгэл дээрэ тэдний чамайг үнэлсэн хэмжээнээс илүүгээр авъяас чадвараа гаргах хэрэгтэй. Өөрөөр хэлвэл жүжигчин болоход чинь том нөлөө үзүүлэх хүмүүст үргэлж чамаас хүсэн хүлээж байгаагаас нь илүү үр дүнг үзүүлээрэй.
Загвар зохион бүтээгч: Их сургуульд орохоосоо ч өмнө чи юм оёх, зурах гэсэн хоёр чадварыг эзэмшсэн байх хэрэгтэй. Энэ хоёрыг сайн гартаа оруулаагүй тохиолдолд загвар зохион бүтээгчээр том амжилтанд хүрэхэд хэцүү. Хичээлээс гадна үргэлж өөрийгөө хөгжүүлэн, бүтээлч сэтгэлгээгээр шинэ загварууд зурж түүгээрээ өөрийн гэсэн альбом нээгээрэй. Мөн зурсан зурагнуудаа битгий хаяж бай. Дараа нь чамд шинэ сэдэл өгч болох юм.
Сэтгүүлийн эрхлэгч: Сэтгүүлч, PR-ын мэргэжилтэн, Харилцааны мэргэжилтний ажлуудыг давхар гүйцэтгэх болох нь дээ охин минь. Юун түрүүнд чи оюутан, эсвэл шинэ ажилтан байх хугацаандаа өөрийнхөө “portfolio” буюу хавтаст бүтээлээ дүүргэх зүйлсийг хийх хэрэгтэй. Блог хөтлөх, сургуулийнхаа сонинд ажиллах зэргээр өөрийгөө хөгжүүлж сэтгүүлзүйн олон салбарт нэрээ одооноос таниулж эхлээрэй.

Багш: Багш хүнд хошин шогийн мэдрэмж, хувийн зохион байгуулалт, аливааг хурдан ойлгуулах чадваруудын аль аль нь хэрэгтэй. Одооноос жаахан дүү нартаа, эсвэл найз нөхөддөө ямар нэг ойлгохгүй байгаа хичээлд нь тусалж заах дадлага хийгээрэй.
Сурвалжлагч: Нэртэй телевизийн мэдээний сурвалжлагч болохыг хүсч байна уу. Тэгвэл мэдээ үзэж, гэртээ ганцаараа байхдаа ч хүнээс яриа авч байна хэмээн сэтгэж өөрийгөө дадлагажуулаарай. Мөн сурвалжлагч хүн улс төр, урлаг, эдийн засаг, түүх, шашин гээд бүх л салбарт “хутгалддаг” сайхан ажил учраас өөрийнхөө суурь мэдлэгийг дээшлүүлэх тал дээр анхаарагтун. Тэгвэл та үеийнхнээсээ амархан цойлох болно.
Хуульч: Сургуулийнхаа оюутны холбоонд элсэж, төрөл бүрийн хуулийн талаарх илтгэл семинаруудад оролцож бай. Мөн сүүлийн үед гарч байгаа хэргүүд дээр ажиллаж байсан бол ямар үндэслэлээр хэрэглэгчээ өмгөөлж болох тухай үргэлж бодож байгаарай. Энэ нь чиний ур чадварыг хөгжүүлнэ.
Вебмастер: SEO, CMS, Html, Javascript, Photoshop, InDesign, Adobe-ийн хувилбруудыг гартаа оруулаарай. Тэгээд өөрийн гэсэн жижиг вебсайтаар гараагаа эхэлж болно шүү дээ. Интернетийн сүлжээ өргөсөөд вебсайтыг үнэгүй ч хийчихэж болдог болсон. Тиймээс эрин цагийнхаа өгч байгаа боломжийг ашиглаарай.
Шинжлэх ухаанч: Сониучхан байх бол чиний хамгийн том зэмсэг. Юм бүхний учир шалтгааныг сонирхож, түүнийгээ мэдэхийн төлөө эрмэлздэг байвал ямар төрлийн шинжлэх ухаанд хүчээ үзэх ёстойг чинь цаг хугацаа харуулаад өгнө.
Нягтлан бодогч: Сайн нягтлан бодогч болохын тулд чамд тооцоолон бодох, математатикийн өндөр чадвар хэрэгтэй. Энэ чадвараа хөгжүүлэхэд туслах найдвартай зам бол яахын аргагүй дахин дахин оролдох явдал юм. Мөн одоо үед ихэнх компаниуд нягтлан бодогчоо мэдээлэл технологийн мэдлэгтэй байхыг шаарддаг болсон. Үүнийг ч бас бодолцоорой.

Эмч: Хамгийн түрүүнд чи өөрийнхөө сэтгэлзүйг бэлдэх хэрэгтэй. Эмч бол олон цагаар нойргүй ажиллаж, үргэлж шархалсан хүнд өвчтэй хүмүүстэй харьцах ажил. Хэрэв чи өөрийнхөө сонгосон мэргэжилд үнэхээр дуртай бол энэ зэргийн хүндрэлүүд юу ч биш юм. Их сургуулийнхаа проффесоруудтай нягт ажилла.
Эцэст нь зөвлөхөд чи ямар ч ажил хийхийг хүсдэг байсан, өөрийнхөө сэтгэл дотор аль хэдийн тэр ажилдаа мэргэшчихсэн хүн шиг итгэл дүүрэн, бардам байж өөртөө хүндэтгэлтэй ханддаг байх хэрэгтэй шүү. Амжилт хүсье хонгор минь!

Эх сурвалж Гоолингоо.мн