Манай дугуйчид Зүүн Азийн наадмаас хоёр медаль хүртлээ

БНХАУ-ын Тяньжинь хотноо болж буй Зүүн Азийн зургаадугаар наадмаас Монголын дугуйн тамирчид мөнгө, хүрэл медаль хүртээд байна.

Тус тэмцээний эрэгтэйчүүдийн 80 километрийн бөөн гараатай уралдаан өчигдөр болсон. Тус төрөлд ОУХМ А.Алтансүх 1:43:28 цагийн амжилтаар мөнгөн медаль, ОУХМ Т.Төгөлдөр 1:43:46 цагийн амжилтаар хүрэл медаль хүртлээ.

Энэ зайд 28 тамирчин гараанаас гарснаас 21 нь замаа дуусгасан бөгөөд Тайванийн Чун Кай 1:43:06 цагийн амжилтаар алтан медаль хүртсэн байна.

Мөн эмэгтэйчүүдийн 50 километрийн бөөн гараатай уралдаанд Ази тивийн аварга Т.Энхжаргал зургаадугаар байрт шалгарлаа. Тус тэмцээнд манай улсаас эмэгтэй гурав, эрэгтэй дөрвөн тамирчин оролцсоноос нэг мөнгө, нэг хүрэл медаль хүртсэн амжилтаар тэмцээнээ дуусгалаа.