Хоёр автомашин шатжээ

Өнгөрсөн хоногт нийслэлийн Онцгой байдлын газарт объектын гал түймрийн 11, гал түймрийн зөрчлийн 1 дуудлага иржээ.

Тодруулбал, байшин шатсан 2, машин шатсан 2, хашаа шатсан 1, хог шатсан 6 дуудлагатай байсны 50 хувийг хог шатсан дуудлага эзлэж байгаа аж.

Өчигдөр Баянзүрх дүүрэг, ХӨСҮТ-ийн хойно 15.50 цагийн үед Аксент загварын суудлын автомашин шатсан бол, Хууль сахиулах их сургуулийн урд 18:47 цагийн үед Тоёото лексүс-470 загварын автомашиний хөдөлгүүрийн хэсэг шатаж байсныг унтраасан байна.

Мөн өчигдөр Баянзүрх дүүргийн 5 дугаар хороо, 80 дугаар байрны 4 давхар айлын тагт, тус дүүргийн Дарь эхийн гудамжинд 6х16 метрийн хэмжээтэй мансардтай байшин шатаж, Аврах, гал унтраах анги шуурхай ажиллан унтраажээ.

Г.Билгүүн