“Нисванис”-ынхан дөрөв дэх цомгоо гаргахаар болжээ

Монголын хөгжмийн ертөнцөд гранж, пост гранж, альтернатив чиглэлээр уран бүтээлээ туурвидаг “Нисванис” хамтлаг энэ жил 17 жилийн ойтойгоо золгож байгаа билээ. Тэд дөрөв дэх цомгоо гаргахаар болжээ. Цомгийнхоо дуунуудаа бичүүлж дуусч байгаа аж. 12 дуутай шинэ цомогт нь тэр бүр хөндөөд байдаггүй сэдэвтэй дуунууд орсон байна. “Нисванис” хамтлаг 1996 оны дөрөвдүгээр сарын 9-нд байгуулагдсан.

Энэхүү хамтлаг нь жил бүр хамтлаг байгуулагдсан өдрөөрөө болон өвөл, зуны улиралд тоглолт хийж, “Coke”n Beat”, “Playtime” зэрэг наадамд оролцон ая дуугаа өргөдөг уламжлалтай. Монголын гранж рокеруудын загалмайлсан эцэг хамтлаг гэгддэг “Нисванис” хамтлагийн урын санд хурц хэллэг, түргэн хэмнэлтэй дуу олон. Тэдний “Хүчилтөрөгч”, “Нисдэг таваг”, “Саарал үе” цомог өөр өөрсдийн онцлогтой.