Туркийн Засгийн газрын хөнгөлөлттэй зээлээр 5000 айлын орон сууц барина

Бүгд Найрамдах Турк Улсын Ерөнхийлөгч Абдулла Гүл өөрийн улсад ажлын айлчлал хийж буй Монгол Улсын Барилга, хот байгуулалтын сайд Ц.Баярсайханыг энэ сарын 5-нд Истанбулын Тарабя дахь ордондоо хүлээн авч уулзжээ.

Сайд Ц.Баярсайхан Монгол, Туркийн харилцаа улс төр, эдийн засаг, нийгмийн бүхий л салбарт амжилттай хөгжиж байгааг дурьдаад тус улсын Ерөнхий сайд Р.Т.Эрдоаны өнгөрсөн хавар Монгол Улсад хийсэн албан ёсны айлчлал уг харилцааг цаашид эрчимжүүлэхэд чухал ач холбогдолтой болсныг онцлон тэмдэглэлээ.

Уг айлчлалын мөрөөр хийх ажлын хүрээнд хоёр улсын барилга, хот байгуулалтын салбарын хамтын ажиллагааг өргөтгөх, шинэчлэлийн Засгийн газраас дэвшүүлсэн орон сууцны төсөл, хөтөлбөрийг хэрэгжүүлэхэд туркийн талтай хамтран ажиллах, гэр хорооллыг дахин төлөвлөх, барилгын салбарт дэвшилтэт технологи нэвтрүүлэх талаарх туршлага судлах, боловсон хүчин бэлтгэх зэрэг асуудлыг сайд хөндөж ярьсан байна. Ялангуяа, Туркийн Засгийн газрын хөнгөлөлттэй зээлээр 5000 айлын орон сууц барих ажлыг хурдасгахад дэмжлэг үзүүлэхийг Ерөнхийлөгчөөс хүслээ.

Ерөнхийлөгч А.Гүл Турк, Монголын харилцаа амжилттай хөгжиж байгааг сэтгэл ханамжтай тэмдэглээд сайдын тавьсан асуудлыг шийдвэрлэхэд дэмжлэг үзүүлэхээ илэрхийлэв. Мөн Монголд шинэчлэлт, бүтээн байгуулалтын ажлыг улам өрнүүлж, эрчимжүүлэхийн тулд гадаадын, түүний дотор Туркийн хөрөнгө оруулалтыг нэмэгдүүлэх талаар анхаарч ажиллахыг зөвлөв.

Барилга, хот байгуулалтын сайд Ц.Баярсайхан тус яамны Төрийн нарийн бичгийн дарга Р.Эрдэнбүрэн нар мөн өдөр Туркийн Экзим банкны удирдлагатай уулзаж, Улаанбаатарт орон сууцны хороолол барихад зориулж, Туркийн Засгийн газраас олгох 300 сая ам.долларын хөнгөлөлттэй зээлийн асуудлыг ярилцжээ.

М.Янжин /Нийслэл таймс/