NBA-ийн од тоглогч наадам үзнэ

Монголын спорт сонирхогчид тэр дундаа сагсан бөмбөгийн хорхойтнуудын хувьд гайхалтай бас дурсамжтай үйл явдал тохиох гэж байна.

Энэ бол домогт Чикаго Буллс багийн довтлогч, Английн шигшээ багийн ахлагч, NBA-гийн шилдэг тоглогчдын нэг Луол Дэнг /Luol Deng/-ийн Монгол дахь айлчлал юм.

Тэрээр Үндэсний их баяр наадмын тэмдэглэлт өдрүүдийг тохиолдуулан энэ сарын 12-14- ний хооронд айлчлах юм байна.

Зуны амралтаараа манай улсад зочилж буй NBA-гийн шилдэг тамирчин маань Монгол үндэсний наадам, ёс заншилтай танилцахын зэрэгцээ өөрийн удирдан явуулдаг “Luol Deng Foundation” сангийн шугамаар ажиллах гэнэ.

Дашрамд дуулгахад сагсан бөмбөгийн спортыг дэлгэрүүлэх, хөгжүүлэх төсөл хөтөлбөрүүдийг дэмжиж ажиллахын зэрэгцээ эрүүл мэнд, боловсролыг дэмжих, гэмт хэргийг бууруулах зэрэг нийгмийн асуудлыг шийдвэрлэх зорилготой энэхүү санг Луол Дэнг анх 2005 онд байгуулж байжээ.

Тэрээр 1985 оны дөрөвдүгээр сарын 16-нд Судан улсын Вау хотод төржээ. Түүний эцэг Алдо нь Суданы засгийн газрын гишүүн байсан бөгөөд Суданд хоёр дахь иргэний дайн гарах үед Египт улс руу гэр бүлээ нүүлгэн суурьшсан байна. Египтэд байхдаа Дэнгийн гэр бүл NBA-гийн төвийн тоглогч, нутаг нэгт Манют Болтой танилцаж, Бол Луол болон түүний ах Ажу нарт сагсан бөмбөгийн спортыг анх зааж өгсөн байна.

Д.Жавхлан