Хаврын тэнгэр “ааш”-аа харуулна

Манай орны нийт нутгаар хүйтний эрч суларч урин дулаан хаврын урь оржээ. Одоогийн байдлаар  нийт нутгийн 70 орчим хувь нь цасан бүрхүүлтэй байгаагаас 30 орчим хувьд нь 10 см-ээс зузаан, нягтарч хатуурсан цастай байгаа аж. Харин 16 аймгийн 99 сум зудын байдалтай байна.
Хэдийгээр цаг наашилж байгаа ч хаврын тэнгэр аашаа цухалзуулж эхлэх нь. Тухайлбал, өнөөдрөөс баруун аймгуудын нутгаар, маргааш  ихэнх нутгаар, 9-нд говь болон зүүн аймгуудын нутгаар салхи 18-20 м/с, говийн бүс нутгийн зарим газраар түр зуур 28-30 м/с хүрч хүчтэй цасан болон шороон шуурга шуурахыг холбогдох газруудаас мэдээллээ.

Агаарын температур энэ сарын 8-нд нутгийн баруун хагаст, 9-нд нутгийн зүүн хагаст  өмнөх хоногоосоо 5-15 хэмээр хүйтэрнэ. Түүнчлэн хүчтэй салхи шуурганы улмаас зам, даваа хаагдах, үзэгдэх орчин муудах тул авто болон агаарын тээвэр,төмөр зам зэрэг байгаль цаг агаараас хамаарал ихтэй аж ахуйн нэгж байгууллагууд, ард иргэд, малчид, тээвэрчдийг цаг агаарын аюул гамшгаас, урьдчилан сэргийлж, ажил төрлөө эртнээс зохицуулах арга хэмжээ авахыг Цаг уур, орчны шинжилгээний газраас анхааруулав.
Эх сурвалж: