С.Баяр Канадаас ирээд Н.Энхбаяртай уулзах зөвшөөрөл хүсчээ

-ТЭРБЭЭР СҮҮЛИЙН ҮЕД НАМЫНХАНДАА ИЛААРШ САНАА ДУУЛГАХ БОЛОВ-

УИХ-ын гишүүн асан С.Баяр Канадаас дөрөв хоногийн өмнө иржээ. Тэрбээр гадаадаас ирэнгүүт ШШГЕГ-аас Н.Энхбаяртай уулзах зөвшөөрөл хүссэнийг эх сурвалжууд өгүүлж байна.

Уг нь С.Баяр, Н.Энхбаяр хоёрын улс төр хийгээд хувь хүний хоорондын харилцаа нь ихэд тааламж муутай байсан. АНУ руу явахаасаа өмнө С.Баяр Н.Энхбаяртай хэвлэл мэдээллийн хэрэгслээр багагүй “тулалдсан” Шууд хэлэхэд “Долдугаар сарын 1″-ний үймээний үеэр галт зэвсэг хэрэглэх чиглэлийг хэн, хэрхэн өгсөн талаар тухайн үеийн Ерөнхийлөгч Н.Энхбаяр, Ерөнхий сайд С.Баяр нар өөр өөрсдийн байр сууриа илэрхийлж битүүхэн нэгийгээ буруутгаж байсан. Хурандаа нарыг шүүх хурлын үеэр гэрчийн мэдүүлэг өгөх гэж хамт Очихдоо ч мэндийн зөрүүгүй шахам сууж байгаад салж одоцгоосон билээ. Үүний дараа С.Баяр эмчилгээ хийлгэхээр АНУ-ыг зорьсон. Тухайн үед Ашигг малтмалын газрын дарга Д.Батхуягийг хууль бус лиценз олгосон гэх үндэслэлээр баривчилсан байдаг. Түүнийг С.Баяртай холбоотой гэх мэдээлэл ч үүнтэй зэрэгцэн цацагдаж байсан юм. Учир нь Д.Батхуягийг баривчилсан өдөр С.Баяр АНУ руу ниссэн.

С.Баяр АНУ-д очоод мэс засал хийлгэхийн тулд Сиэтл хотод охиныхоо нэр дээр байдаг хувийн байшингаа худалдсан гэдгийг эх сурвалж хэлж байна. Тодруулбал, Сиэтл хотын Куйн Энн дүүргийн Кондо хорооллын  “WA 981193” тоот байшингаа нэг сая шахам ам.доллараар худалдсан байгаа юм. С.Баяр тус байшингаа өнгөрсөн онд худалдаж авсан гэдэг. Хотынхоо хамгийн тансаг гудамжинд байрлах энэхүү элит хаус зүг бүрт харсан цонхтой, цонх бүр тагттай байсан аж. Түүний хаусыг нэгэн эмэгтэй өнгөрсөн тавдугаар сарын дундуур худалдаж авчээ.

Ерөнхий сайд асан С.Баяр хаусаа зарсны дараа буюу өнгөрсөн зургадугаар сарын 6-нд АНУ-ын Сиэтл хотод зүрхний хүнд мэс засалд орсон. Тодруулбал, түүний зүрхний титэм судсанд төмөр цагираг суулгаж өргөсгөх мэс ажилбар хийхэд дөрвөн цаг зарцуулсан гэдэг. Хатуу дарс олон жил ихээр хэрэглэснээс үүдэн зүрхний титэм судас нарийссан гэдгийг зарим хүмүүс хэлж байгаа. Одоогоос хоёр жилийн өмнө тэрээр элэгний мэс засалд орж багагүй хугацаанд гадаадад эмчлүүлсэн билээ. Харин зүрхний мэс засал хийлгэснийхээ дараа сар гаруй дэглэм сахиад наадмын дараа Монголд иржээ. Намынх нь нөхөд түүнийг наадмаас өмнө эх орондоо ирж, эрүүл саруул болсноо харуулна гэцгээж байсан. Түүнчлэн түүнийг улс төрийн үйл ажиллагаагаа идэвхжүүлнэ гэсэн яриаг ч гаргасаар байсан. Гэвч С.Баяр наадмын дараа намынхандаа бүү хэл ойр тойрны хүндээ мэдэгдэлгүй их л нууцлагдмал иржээ. Эх орондоо ирснээсээ хойш Өвөрхангай аймгийн Бүрд сумын нутагт орших Элсэн тасархайн амралтад хэд хоног бүгсэн байна. Харин өнгөрсөн сарын дунд үеэс намынхаа нөхөд рүү утас цохиж “Бие эрүүл саруул болоод ирсэн шүү. Бүрмөсөн илааршсан. Миний зүрх хэвийн цохилж байгаа” хэмээн ярих болжээ. Ингэж намынхандаа биеийн байдлаа илтгэж, өөрөө мэнд мэдэж байгааг нь Ерөнхийлөгчийн сонгуульд бэлтгэж байгаа нь тэр гэж тайлбарлах хүмүүс ч гарч байна. Энэ тайлбарууд нь түүнийг биеийн байдлаасаа болж улс төрөөс нэгмөсөн гарч байгаа гэсэн яриаг үгүйсгэх гэсэн оролдлого болов уу. Гэхдээ эх сурвалж түүнийг байнга эмчийн хяналтад эмчилгээ хийлгэж байх шаардлагатайг хэлж байсан. Харин энэ байдлаа тэрээр ихэд нууцалж эрүүл саруул болсон гэдгээ тунхаглаж яваа гэнэ.

С.Баяр Монголдоо ирж сар шахам гам сахиад үе, үе гадагшаа гардаг болжээ. Хамгийн сүүлд тэрбээр Канадад хэд хоноод ирж байгаа нь энэ юм байна. Ирсэн даруйдаа намынхаа бүлгийн хуралд сууж, улс төрийн идэвхээ сэргээж, ил далд уулзалт зохион байгуулах болсон байна. Мөн ял эдэлж буй Н.Энхбаяртай уулзах хүсэлтээ ч ШШГЕГ-т хүргүүлсэн нь хачирхалтай. Нэг үе журмын нөхөд байсан хоёрт гэнэт уулзах ямар шалтгаан байгаа юм бол. Ирэх жилийн Ерөнхийлөгчийн сонгуулийн улс төр гэх мэтээр хор найруулах олон л зүйл байгаа биз ээ.

Л.ТӨР Ц.ӨРНӨХ

Тус мэдээллийг бусад хэвлэл мэдээллийн байгууллага хуулбарлан нийтлэхийг ХАТУУ хориглоно.

ӨДРИЙН СОНИН-МЭДЭЭ.МН