Жүдо бөхийн УАШТ эхэллээ

Монголын бүх ард түмний XIII их наадмын жүдо бөхийн тэмцээн өнөөдөр Буянт-Удаа дахь Спортын ордонд эхэлж байна. Биеийн тамир, спортын тухай хуулийн 16.1, Засгийн газрын 2011 оны 249 дүгээр тогтоолыг хэрэгжүүлэх, жүдо бөхийн спортыг орон даяар сурталчлах, хүүхэд, залуучуудын жүдо бөхөөр хичээллэх дур сонирхлыг нэмэгдүүлэх, Монгол Улсын Ерөнхийлөгчийн нэрэмжит “Чингис хаан-2012” Дэлхийн цомын аварга, Ази тивийн аварга шалгаруулах тэмцээнд оролцох баг тамирчдыг сонгон шалгаруулах, улсын шигшээ багт орох тамирчдыг сонгон шалгаруулах зорилготой тус тэмцээн уламжлал ёсоор эрэгтэй, эмэгтэй тус бүр долоон жингийн ангилалд болно. МБАТ-ий их наадмын жүдо бөхийн тэмцээнд 25 багийн 246 тамирчин зодоглох юм.

Тэмцээн өнөөдөр, маргааш хоёр өдөр үргэлжлэх бөгөөд хуваарийн дагуу өнөөдөр эрэгтэйчүүдийн 60, 66, 73 кг, эмэгтэйчүүдийн 48, 52, 57, 63 кг-ын жингийн барилдаан болно. Тэмцээний нээлтийн ёслол өнөөдөр 15.00 цагт болох юм.