“Чимээгүй хотын жолооч” кино олон улсын “А” зэрэглэлийн фестивалиас гранпри шагнал хүртлээ

Дэлхийн кино урлагийн А зэрэглэлийн фестиваль болох “Talling Black Night Film Festival”-д Ж.Сэнгэдоржийн бүтээл “Silent City Driver” буюу “Чимээгүй хотын жолооч” кино гранпри шагнал болон “Шилдэг зураач” шагнал хүртжээ.

Уг фестивальд 80 орны 280 уран сайхны кино өрсөлдөж, 60 орны 1500 гаруй уран бүтээлчид, сэтгүүлч, шүүмжлэгчид цуглаж, 800 удаагийн үзвэрийг 150.000 орчим үзэгчид үзэж сонирхсон байна. Энэ талаар ”Чимээгүй хотын жолооч”киноны ерөнхий найруулагч Ж.Сэнгэдорж, ”Кино баг бид бүгдийн хувьд гайхалтай шөнө байлаа. Кино бол нийлмэл урлаг. Энэ бол та нарын шагнал. Кино багтаа амжилт хүсье” гэжээ.

Сонирхуулахад, ”Tallinn Black night film festival” нь энэ жил 28 дахь удаагаа зохион байгуулагдаж байгаа “International Federation of Film Producers Association” (FIAPF) буюу олон улсын продюсеруудын холбооноос итгэмжлэгдсэн A-list film festival буюу дэлхийн шилдэг 15 кино наадмын нэг юм.