ШЕЗ-ийн ажлын албаны дэргэдэх Ёс зүйн дэд хороо эхний хагас жилийн тайлангаа танилцууллаа

Шүүхийн ерөнхий зөвлөлийн ажлын албаны дэргэдэх Ёс зүйн дэд хороо өнөөдөр (2024.08.23) 2024 оны эхний хагас жилийн тайлангаа ажлын албаны нийт албан хаагчдад танилцууллаа. Тайлангийн танилцуулгыг ШЕЗ-ийн Шүүхийн захиргааны хүний нөөцийн газрын дарга Д.Мөнхбат хийсэн юм.

Тус хороо нь 2024 оны эхний хагас жилийн байдлаар 5 гомдол хүлээн авч, 1 гомдлыг харьяаллын дагуу шилжүүлж, 4 гомдлыг шийдвэрлэсэн байна.  Гомдлын хувьд ажлын албаны албан хаагчдын гомдол 1, Шүүхийн тамгын газрын албан хаагчдын гомдол 1,  шүүхийн Тамгын газрын Ёс зүйн дэд хорооны 2 дүгнэлтийг хянасан байна.

           Шүүхийн Тамгын газрын дэргэдэх Ёс зүйн хорооны дүгнэлтийг эс зөвшөөрч Шүүхийн ерөнхий зөвлөлийн Ажлын албаны дэргэдэх Ёс зүйн дэд хороонд ирүүлсэн 2 гомдлыг Төрийн албан хаагчийн ёс зүйн тухай хуулийн 15 дугаар зүйлийн 15.6-д заасны дагуу хянаж, 1 дүгнэлтийг хэвээр үлдээж, 1 дүгнэлтийг хүчингүй болгож шийдвэрлэсэн.

Шүүхийн Тамгын газрын дэргэдэх Ёс зүйн дэд хороонд нийт 43 гомдол ирснийг хүлээн авч, 34 гомдлыг хуульд заасны дагуу шийдвэрлэж, 8 гомдлыг буцааж,  1 гомдол шийдвэрлээгүй буюу хуулийн хугацаанд хянагдаж байна.

        Шүүхийн ерөнхий зөвлөл болон анхан болон давж заалдах шатны шүүхийн дэргэдэх Ёс зүйн дэд хорооны нийт шийдвэрлэсэн 34 гомдлын 14 гомдлыг нь ёс зүйн зөрчил тогтоогдсон гэж үзсэн бол  20 гомдлыг ёс зүйн зөрчил тогтоогдоогүй гэж үзжээ.

           Ёс зүйн зөрчил тогтоогдсон 14 гомдлын 1 ёс зүйн зөрчилд Төрийн албан хаагчийн ёс зүйн тухай хуулийн 16 дугаар зүйлийн 16.1.1-д заасны дагуу “гомдол гаргагчид, эсхүл олон нийтийн өмнө уучлал гуйхыг үүрэг болгосон” ёс зүйн хариуцлага хүлээлгэжээ.

               Ёс зүйн 5 зөрчилд Төрийн албан хаагчийн ёс зүйн тухай хуулийн 16 дугаар зүйлийн 16.1.2-д заасны дагуу “өөрт нь ганцаарчилсан хэлбэрээр сануулах” ёс зүйн хариуцлага хүлээлгэсэн бол 3 зөрчилд Төрийн албан хаагчийн ёс зүйн тухай хуулийн 16 дугаар зүйлийн 16.1.3-д заасны дагуу “Нээлттэй сануулах” ёс зүйн хариуцлага хүлээлгэсэн байна.

         Төрийн албан хаагчийн ёс зүйн тухай хуулийн 16 дугаар зүйлийн 16.1.4-д заасан “төрийн албаны тухай хуульд заасны дагуу төрийн албанаас халах”, 16.3-д заасан ёс зүйн хариуцлага хүлээлгэсэн ёс зүйн зөрчил байхгүй байна.