Хорих 461 дүгээр ангийн эмч, алба хаагчдыг шалгаж байна

Цагдаагийн алба хаагчдад зодуулж, нас барсан гэх 21 настай залуугийн хэрэг олны анхаарлын төвд байна. Талийгаачийг эмнэлгийн тусламж авахад гарыг нь гавласан байсан нь хүний эрх зөрчсөн асуудал гэдгийг холбогдох байгууллагаас мэдээлсэн. Тэгвэл тухайн өдөр үүрэг гүйцэтгэж байсан хорих 461 дүгээр ангийн эмч, албан хаагчдад хэрэг үүсгэн, нийслэлийн Баянгол дүүргийн цагдаагийн хэлтсээс шалгаж байгаа гэдгийг хохирогчийн өмгөөлөгч мэдээллээ.

Талийгаачийн буяны ажил явдал өнөөдөр болж, хөдөөлүүлжээ.

Энэ хэргийг Авлигатай тэмцэх газраас шалгаж байгаа бөгөөд өнөөдрийг хүртэл хэргийн талаар олон нийтэд мэдээлээгүй байгаа юм. Хэргийг тодруулах гэсэн боловч прокурорын байгууллагаас зөвшөөрөл ирүүлээгүй байна гэдэг хариултыг албаныхан өгсөн.

Хохирогчийн эгч өмнө нь мэдээлэл өгөхдөө “Миний дүүг нэг гэмт хэрэгтэн 461 дүгээр ангид хоригдож байгаад нас барсан мэтээр ярьж байна. Гэтэл гэрэг нь шүүхээр эцэслэгдэн шийдвэрлэгдээгүй байсан. Үүнийг онцолж хэлмээр байна. Тухайн холбогдсон байсан хэрэг нь гадуур шалгах боломжтой хөнгөн гэмт хэрэг байсан. Үүний дагуу хэрэг нь шалгагдаад өчигдөр /2024.07.23/ хариу нь гарсан. Гэтэл дүү минь шүүхийн хариу гарахаас нэг цагийн өмнө нас барсан. Тухайн хэрэгт дүү маань гэм буруугүй байсан. Хамт явж байсан хүн нь утас хулгайлснаас болж сэжигтнээр шалгагдсан. Нийслэлийн Баянгол дүүргийн нэгдүгээр хэлтсийн нэр бүхий цагдаагийн алба хаагчид хэлтэс дээрээ авчирч мэдүүлэг авах журмаар эрүүдэн тамласан. Нийтдээ найман хүн байсан. Цагдаагийн алба хаагчдад зодуулж, тамлуулсан гэдгээ ар гэрийнхнээсээ нуусан. Үүнийг нь бид 3-4 хоногийн дараа мэдсэн.

Улмаар Авлигатай тэмцэх газарт өргөдөл өгсөн. Нийт өргөдөл гаргасан найман алба хаагчдын зургаа нь тогтоогдсон.

Авлигатай тэмцэх газарт өргөдөл өгснөөс болж сэжигтэн байсан миний дүүг нэг сараар саатуулсан. Саатуулж байх хугацаанд нь Баянгол дүүргийн нэгдүгээр хэлтсийн цагдаа залгаж утсаар дарамталсан. Нэг сарын хугацаа нь дуусаад гараад ирсний дараа нь мөн л хянагчаар нь дамжуулж дарамталсан. Үүнийг мөн шалгах хэрэгтэй. Энэ мэт дарамт шахалтаас болж айсандаа Авлигатай тэмцэх газар очиж чадаагүй. Байцаалт өгч чадахгүй явсаар байх үед нь Авлигатай тэмцэх газраас зургаан албан хаагчийг таниулахаар дуудсан. Ийнхүү Авлигатай тэмцэх газар луу очиж явахад нь хашааных нь үүднээс Баянгол дүүргийн хоёр цагдаа барьж авсан. Авч явсныхаа дараа хэргийг нь Чингэлтэй дүүрэг рүү шилжүүлээд 461 дүгээр хорих ангид гурван сарын баривчилгаанд явуулсан. Долдугаар сарын 11-нээс дүүгийн минь биеийн байдал муудаж эмнэлэгт мэдэгдсэн гэж хэлсэн. Гэтэл одоо 461 дүгээр хорих анги, прокурорын байгууллага аль аль нь мэдэхгүй байгаа. Бид шат шатны бүх байгууллагуудад гомдолтой байна. Дүү минь одоо өөрийгөө өмөөрч үг хэлэх ямар ч эрхгүй болсон” гэсэн юм.