Огноо: 2024/6/27 13:33:08

НҮБ: Жил бүр гурван сая орчим хүн архины улмаас нас бардаг

imageЖил бүр гурван сая орчим хүн архи хэрэглэсний улмаас нас бардаг гэж Дэлхийн эрүүл мэндийн байгууллага (ДЭМБ) мэдэгдээд, сүүлийн жилүүдэд нас баралтын түвшин бага зэрэг буурсан хэмээжээ.
НҮБ-ын эрүүл мэндийн агентлагаас гаргасан архи, эрүүл мэндийн талаарх хамгийн сүүлийн тайланд архи, согтууруулах ундааны улмаас дэлхийн хэмжээнд жил бүр 20 орчим хүн тутмын нэг нь согтуугаар тээврийн хэрэгсэл жолоодох, архинаас үүдэлтэй хүчирхийлэл, хүчирхийлэл, олон төрлийн өвчин, эмгэгийн улмаас нас бардаг гэж тэмдэглэжээ.
ДЭМБ-ын Ерөнхий захирал Тедрос Адханом Гебрейюс “Архи, согтууруулах ундааны хэрэглээ нь хувь хүний эрүүл мэндэд ноцтой хор хөнөөл учруулж, архаг өвчин, сэтгэцийн эрүүл мэндийн байдлыг дордуулж байна. 2010 оноос хойш дэлхий даяар архины хэрэглээ болон түүнээс үүдэлтэй хор уршиг тодорхой хэмжээгээр буурсан. Гэхдээ архины хэрэглээнээс үүдэлтэй эрүүл мэнд, нийгмийн ачаалал өндөр хэвээр байна” гэжээ.
2019 онд архинаас үүдэлтэй нас баралтын 13 хувийг 20-39 насныхан эзэлж байжээ. Архи уух нь элэгний хатуурал, зарим хорт хавдар зэрэг олон төрлийн эрүүл мэндийн нөхцөл байдалтай холбоотой байдаг. Архи хэтрүүлэн хэрэглэх нь сүрьеэ, ХДХВ, уушгины хатгалгаа зэрэг халдварт өвчинд илүү өртөмтгий болгодог гэж тайланд дурджээ. 2019 онд ойролцоогоор 209 сая хүн архины хамааралтай амьдарч байсан нь дэлхийн хүн амын 3.7 хувь юм. Дэлхийн хэмжээнд нэг хүнд ногдох нийт архины хэрэглээ есөн жилийн өмнө 5.7 литр байсан бол 2019 онд бага зэрэг буурч, 5.5 литр болсон байна. Гэхдээ архины хэрэглээ дэлхий даяар жигд бус тархсан байна. Европт нэг хүнд ногдох архины хэмжээ хамгийн өндөр буюу 9.2 литр, Америк тивд 7.5 литр байна. Хамгийн бага хэрэглээ нь Хойд Африк, Ойрхи Дорнод, Азийн исламын шашинтай орнуудад байсан гэж тайланд дурджээ. Дэлхий даяар 15-19 насныхны 23.5 хувь нь архи уудагт тооцогддог байна. Энэ нь Европт амьдардаг энэ насны хүмүүсийн хувьд 45 гаруй хувь, Америкт бараг 44 хувь болж өссөн байна. ДЭМБ-аас бодисын хэрэглээний эмгэгийг чанартай эмчлэх хүртээмжийг сайжруулах нь нэн чухал гэж мэдэгджээ.

URL: