Роналдо дээд амжилт тогтоосныхоо дараа тоглох хугацаа бага үлдсэнийг санууллаа

Португалын шигшээ баг өчигдөр Ирландыг нөхөрсөг тоглолтод 3:0-ээр хожлоо. Энэ тоглолтод 39 настай Криштиано Роналдо Дос Сантос Авэйро дубль хийсэн юм. Энэ нь түүний мэргэжлийн хөлбөмбөгчийн замнал дахь 1226 дахь тоглолт болсноор Дэлхийн дээд амжилтыг тогтоож байна. Бразилын хаалгач Рожерио Сени 42 настайдаа замналаа өндөрлүүлэхдээ 1225 тоглолтод оролцсон нь өчигдрийг хүртэл Дэлхийн дээд амжилтад тооцогдож байсан юм.

Криштиано Роналдогийн хувьд Португал, Англи, Испани, Итали, Саудын Арабын лигт 698, цомын тэмцээнүүдэд 101, олон улсын клубүүдийн тэмцээнүүдэд 220, шигшээ багтаа 207 тоглолтод оролцсоноор 1226 тоглолтын тоо бүрдэж байна. Роналдогийн гоолын тоо 895-д хүрч, 900-гийн босгыг давахад хэдхэн гоол дутуу боллоо. Энэ 895 гоолын 130 нь шигшээ багийнх юм. Ирландын хаалганд хоёр гоол оруулсныхаа дараагаар Роналдо “Шигшээ багийнхаа төлөө гоол хийх бүрт онцгой сайхан мэдрэмж амсдаг. Энд ирж, тоглож, гоол оруулж, хамгийн гол нь хожиж, сайхан хөлбөмбөг үзүүлж чадсандаа баяртай байна. Манай багийнхан эрч хүчтэй байж, сайн хамгааллаа. Өнөөдрийн тоглолтод оролцсон бүх тоглогчдодоо баяр хүргэе. Манай шигшээ ингэж л тоглох ёстой. Мөн үргэлж шигшээ багаа дэмждэг хөгжөөн дэмжигчдэдээ баярласнаа илэрхийлэхийг хүсч байна” хэмээжээ.

Роналдог яагаад хэдэн хоногийн өмнө Хорватын эсрэг тоглоогүйг асуухад “Дасгалжуулагч намайг жаахан амраад ав гэсэн юм. Тиймээс үгийг нь дагасан. Би зургаадугаар сарын 6-нд шигшээ багийнхаа бэлтгэлд гарсан. Тэгээд өнөөдрийн тоглолтод оролцохоор эхнээсээ тооцсон. Хамгийн чухал тоглолт энэ сарын 18-наас эхэлнэ шүү дээ. Европын АШТ-ийг бид сайн эхлүүлж, би форм сайтай байхыг хүсч байна. Ер нь хөлбөмбөг тоглох хугацаа нэг их урт биш үлдсэн. Тиймээс би тоглолт бүрээсээ таашаал бүрэн мэдрэхийг хүсч байгаа. Энэ удаагийн Европын АШТ-д эх орноо төлөөлөн оролцохоор болсондоо бахархаж байна. Яг л 20 настай үеийнх шигээ мөрөөдөл минь хэвээрээ байгаа. Гоол оруулах нь миний ДНК-д байдаг зүйл. Хамгийн гол нь би ажилдаа өөрийгөө бүрэн зориулж чаддаг. Шигшээ багаа насан туршдаа хайрлах болно. Шигшээ багтайгаа цом өргөхийг мөрөөдөж явна” хэмээн тэрбээр өгүүлжээ. Евро2024-д Португалын шигшээ Гүрж, Турк, Чехтэй нэг хэсэгт орсон.

Tumen.mn