Японд махчин нян залуусын дунд тархаж байна

Японд стрептококк бактерийн гаралтай хүнд хэлбэрийн халдвар тархаж байна. 2024 оны эхний хоёр сард стрептококкийн хам шинжийн 378 тохиолдол бүртгэгджээ.

“The Guardian” хэвлэлд мэдээлснээр, аминд аюултай А бүлгийн стрептококкийн хүнд хэлбэрийн халдвар хэрхэн үүссэн тухай шинжээчид тодорхой хэлж чадахгүй байна. Кавасакигийн анагаах ухааны их сургуулийн профессор Такаши Накано халдварт өвчнөөс урьдчилан сэргийлэх арга хэмжээ авахыг зөвлөж байна.

Гараа угаах, хувийн ариун цэврээ сахих, шархаа ариутгах зэрэг арга хэмжээ авахыг зөвлөжээ. Учир нь стрептококк бактери нь шарх болон салстаар дамжин халдварладаг байна.

Шинж тэмдгийг хэрхэн таних вэ? Стрептококкийн шокийн шинж тэмдэг нь

-Өндөр халуурах

-Бие зарайх

-Хоолой өвдөх

-Булчин шархирч өвдөх

-Дотор муухайрах

-Бөөлжих зэргээр илэрдэг байна.

Өндөр настнуудад ханиадтай ижил шинж тэмдэг илэрч, ангина, уушгины хатгалгаа, хоолой идээлэх, менингит болж хүндрэх аюултай. Илүү хүнд тохиолдолд цусны халдвар буюу сепсис болж, бөөр, элэг, уушги гэмтэх аюултай аж.

Стрептококк бактерийг махчин бактери гэдэг байна. Учир нь тус бактери эсийг үхүүлж, дотор эрхтнүүдийн үйл ажиллагааг огцом сааруулдаг байна. Хэдийгээр өндөр настнуудыг эмзэг бүлэгт хамруулдаг ч Японд 50 хүртэлх насны хүмүүсийн дунд эрчимтэй тархаж, 21 нас баралт бүртгэгдсэн тухай “Асахи Шинбүн” сонинд онцолжээ. Стрептококкийн халдвар агаар, дуслын замаар болон биеийн контакт үүсэхэд халдварладаг. Мөн шархаар дамждаг. Чихрийн шижинтэй хүмүүс эрсдэлийн бүлэгт багтдаг байна.

https://news.zindaa.mn/4tq4