Хуурамч шатахууны хуулийг маргаантай гэж Цэц хүлээж авсныг УИХ-ын гишүүн Б.Пүрэвдорж эсэргүүцэв

УИХ-ын чуулганы нэгдсэн хуралдаан УИХ-ын гишүүн Б.Пүрэвдорж байр сууриа илэрхийлэв.

Тэрбээр “Ойрын өдрүүдэд хоёр жагсаал хийнэ. Хуурамч шатахууны тухай хуулийг УИХ-аар батлуулсан. Гэтэл энэ хуулийг Үндсэн хуулийн цэц маргаан үүсгэж хүлээж авсан байна. 200 мянган тонн хольц оруулж ирж иргэдийн дизель машиныг жил бүр эвддэг. Машины бензин хөдөлгүүр хоёр жил тутамд эвдэрдэг. Хуурамч шатахуун оруулж ирснийхээ үр дүнд 80  тэрбум төгрөгийн ашиг олдог. Энэ хуулийн эсрэг тэмцэж байж батлуулсан юм.

Би 2016 онд санал гаргаад, Үндсэн хуулийн цэцийн гишүүдийн нэг сая төгрөгийн цалинг нь гурван сая болгосон. Гэтэл сүүндээ цадаагүй төлөгнүүд 80 тэрбум төгрөгийн ашиг руу харж, авлига авах гэж байна уу яах гэж байгаа юм. Энэ хуулийг оруулж ирж байна. Маргааш өглөө би ганцаараа ч хамаагүй очиж зогсоно. Машинаа эвдүүлдэг хүмүүс хамт очиж жагсвал жагсана биз.

Нийгмийн даатгалын багц хуулийг яаралтай хэлэлцэх шаардлагатай. Долоон жилийн дунджаар тэтгэвэр тогтоодог болсноос хойш ахмадууд 150 мянган төгрөгөөр хохирдог байсан бол долдугаар сарын 1-нээс тэтгэвэр нэмэгдэхээр 250-300 мянган төгрөгөөр хохирдог болох нь. Энэ жагсаалыг 2023 оны зургаадугаар сарын 19-ний 12:00 цагт зохион байгуулна. Ахмадууд ирж оролцоорой. Бүгдээрээ хамтарч таван жилийн дунджаар тэтгэвэр тогтоолгодог болгуулах шаардлагатай байна” хэмээв.

Эх сурвалж:www.polit.mn