Н.Удаанжаргал Тайландаас машинаар Малайзад очжээ

“Тавантолгой төмөр зам” компанийн гүйцэтгэх захирал Н.Удаанжаргал 2022 оны аравдугаар сард Солонгос руу албан томилолтоор явсан. Тэгээд эргэж ирээгүй юм. Түүнийг 2022 оны арванхоёрдугаар сард ажлаас нь чөлөөлж, АТГ эрүүгийн хэрэг үүсгэсэн. Одоо “Шувуу” ажиллагааны хүрээнд эрэн сурвалжилж байна.

Н.Удаанжаргалыг Аргентинд байгааг хоёр долоо хоногийн өмнө тогтоосон. Гэвч “Шувуу” ажиллагааны багийнхныг Аргентины талтай яриа хэлэлцээр хийж байх үед дахин зугтжээ. Тодруулбал, тус улсын хилээр гараад явчихсан байна. Тэрбээр Тайланд улсад очжээ. Ер нь бол тэрбээр хаана яваагаа хамгийн их мэдэгдэж явдаг “шувуу” юм. Хамгийн сүүлд “…Нүүрсний нээлттэй сонсголд цахимаар оролцъё” гэдэг саналаа Нүүрсний түр хорооны дарга Г.Ганболдод тавьжээ. Г.Ганболд тэгж ярьсан.

Түүнчлэн гадаад руу зугтсан хүмүүсийн пасспортыг хүчингүй болгож, данснуудыг “царцаах” арга хэмжээг “Шувуу” ажиллагааны хүрээнд авсан. Энэ нь нэлээд үр дүнтэй байх шиг байна. Т.Бадамжунай Филиппинд АТМ дээр очоод илчлэгдсэн гэдэг. Тэгвэл

Н.Удаанжаргал ч бас мөнгө, санхүүгийн асуудлаас болоод илчлэгджээ. Тэрбээр хамт яваа найзынхаа ээжийн нэр дээрх банкны картыг ашиглаж байжээ. Өөрөөр хэлбэл, найзынх нь ээжийн данс руу нэр бүхий хүмүүс мөнгө шилжүүлдэг. Мань эр картыг нь ашигладаг байсан аж.

Тэгвэл Н.Удаанжаргал өчигдөр Тайландаас машинаар Малайзад очжээ. “Шувуу” ажиллагааныхан өнөөдрөөс Н.Удаанжаргалыг шилжүүлэн авахаар Малайзын Засгийн газар, хууль хяналтын байгууллагынхантай “ярилцаж” эхлэх бололтой.

Эх сурвалж: polit.mn