WSJ: Кремль газрын тосны хоригийг тойрч гарахад Африкийг ашиглаж байна
НЬЮ-ЙОРК. /WSJ/. ОХУ-ын газрын тосны экспортод тавьсан хориг хэрэгжиж эхэлснээс хойш Хойд Африкийн орнууд тус улсаас газрын тосны бүтээгдэхүүн их хэмжээгээр импортолж эхэлжээ. Үүнтэй холбоотойгоор шинжээчид Оросын ачааны зарим хэсгийг Европ руу дахин экспортолж байж болзошгүй хэмээн сэжиглэж байна гэж “The Wall Street Journal” сонинд бичсэн байна.
Тус хэвлэлд бичиж буйгаар, 2021 онд 600 мянган торх байсан Оросын дизель түлшний импорт Маррокод нэгдүгээр сард хоёр сая торх болж нэмэгдсэн байна. Хоёрдугаар сард тус улсад дахин дор хаяж 1.2 сая торх дизель түлш ирэх төлөвтэй байгаа аж.
Алжир, Египет зэрэг улсуудын импорт ч мөн нэмэгдэх хандлага ажиглагджээ. 2021 онд Оросоос газрын тосны бүтээгдэхүүн бараг импортлоогүй Тунис улсад гэхэд сүүлийн саруудад химийн бодис, хуванцар үйлдвэрлэхэд түгээмэл ашигладаг дизель түлш, хийн тос, бензин, лигроиныг ОХУ-аас оруулах болсон байна.
Нэгдүгээр сард тус улс Оросоос 2.8 сая торх газрын тос импортолсон бөгөөд энэ сард дахин 3.1 сая торхыг импортолно. “The Wall Street Journal” сонинд бичиж буйгаар, Тунис, Мароккогийн импортын өсөлт газрын тосны бүтээгдэхүүнийх нь экспортын өсөлттэй давхцаж байгаа нь Оросын ачааг бусад газрын тосны бүтээгдэхүүнтэй хольж, дахин экспортолж байна гэсэн болгоомжлолыг шинжээчдийн дунд төрүүлж байгаа аж.
Марокко өнгөрсөн сард Испанийн Канарын арлууд руу 280 мянган торх, Турк руу 270 мянган торх түлш нийлүүлсэн нь Марокко руу орж ирсэн Оросын дизель түлшний урсгалтай давхцсан байна.
2022 оны тавдугаар сарын сүүлчээр ЕХ-ны орнуудын удирдагчид Оросын газрын тосны экспортод хориг тавихаар тохиролцож, хориг 12 дугаар сарын 5-наас хэрэгжиж эхэлсэн билээ.
Д.Жаргал
Эх сурвалж: “Монцамэ” агентлаг
URL:
