Дэлхийн шатрын олимпиадад манай шигшээ баг өндөр амжилттай оролцлоо
Энэтхэгийн Ченнай хотноо зохион байгуулагдсан шатрын 44-р олимпиад өчигдөр /2022.08.10/ өндөрлөлөө. 2022 оны долдугаар сарын 26-наас наймдугаар сарын 10-ны өдрүүдэд шатрын ертөнц тэр чигээрээ Ченнайн зүг анхаарлаа хандуулсан.Монголын шатрын холбооны ерөнхийлөгч Э.Гурванбаатараар ахлуулсан С.Ган-од дасгалжуулагчтай эрэгтэй шигшээ баг, Ц.Батсайхан дасгалжуулагчтай эмэгтэй шигшээ багийн хамт олон арын албаныхны хамт тус олимпиадад ганзага дүүрэн оролцлоо.
ЭРЭГТЭЙ БАГ: 187 орны 188 багаас 35 байрыг эзэллээ. Ангилал бүрийн 1-4 ширээний топ 20 шатарчинг шалгаруулж хувийн дүнгээр байр эзлүүлдэг уламжлалтай юм. Монголын шигшээ багийн 3 дугаар ширээнд суусан их мастер Б.Гүндаваа 16 дугаар байрт бичигджээ.
ЭМЭГТЭЙ БАГ: 160 орны 162 орны эмэгтэй багаас 15 дугаар байрыг эзэлж, Монголын шатрын түүхэн дэхь хамгийн өндөр амжилтаа үзүүллээ.Хувийн дүнгээр:
- Эмэгтэйчүүдийн нэгдүгээр ширээнд их мастер А.Энхтуул 19 дүгээр байрт,
- гуравдугаар ширээнд олон улсын мастер Т.Мөнхзул 6 дугаар байрт,
- дөрөвдүгээр ширээнд суусан дэлхийн шатрын холбооны дэд мастер Б.Мөнгөнзул 1 дүгээр байранд бичигдэж Алтан медалийн эзэн боллоо. Эмэгтэйчүүдийн 3 ширээний топ 20 шатарчинд манай улсын 3 шатарчны нэр орсон нь чамлахааргүй амжилт юм.
Дэлхийн шатрын 44-р олимпиадад оролцсон эрэгтэй 186, эмэгтэй 160 холбоодын нийлбэр дүнгээр Шилдэг 30 холбоог шалгаруулж ГАПРИНДАШВИЛИЙН цомын эзнийг тодруулдаг бөгөөд манай улсын шатрын холбоо 24 дүгээр байрт шалгарсан ба дэлхийн шилдэг 30 багийн нэгээр нэрлэгдлээ.
Мөн манай гурван шатарчин болон нэг шүүгч цолоо ахиулсан сайхан мэдээтэй байна.
- Эрэгтэй ангилалд хоёрдугаар ширээнд тоглосон дэлхийн шатрын холбооны мастер Г.Амартүвшин Олон улсын мастер цолны болзол хангасан.
- Эмэгтэй ангилалын гуравдугаар ширээнд тоглосон Эмэгтэйчүүдийн олон улсын мастер Т.Мөнхзул Эмэгтэйчүүдийн их мастер цолны болзол биелүүллээ.
- Эмэгтэй ангилалын дөрөвдүгээр ширээнд тоглосон дэлхийн шатрын холбооны дэд мастер Б.Мөнгөнзул дэлхийн шатрын холбооны мастер цолны болзолоо биелүүлсэн.
- Дэлхийн шатрын холбооны шүүгч Б.Нямдаваа Олон улсын шүүгч цолны болзол биелүүллээ.
Хагас сарын туршид үргэлжилсэн тус оюун ухааны олимпод ийнхүү манай баг тамирчид ургац арвин, өндөр амжилттай оролцож өндөрлүүллээ.
URL:
