УИХ-ын чуулганы хуралдаанаар зарим Элчин сайдыг эгүүлэн татах, томилох асуудлыг хэлэлцэж байна.

УИХ-ын гишүүн Х.Ганхуяг: Бид цаашид гадаад орнуудтай тогтоосон эдийн засгийн харилцаан дээрээ илүү анхаармаар байна. Өнгөрсөн жил гадаадын хөрөнгө оруулалттай 35 компани байгуулагдсан байна. Түүний өмнөх жил 70 гаруй компани байгуулагдсан. Цаг үеийн нөхцөл байдлаас болоод гаднын хөрөнгө оруулалт жил ирэх тусам багассаар байна.

Улаан паспорттой иргэд Турк, Оросоос өөр орон руу явах боломж алга. Хувийн хэвшлийнхэн маань гадагшаа явж эдийн засгийн харилцаа хөгжүүлье гэхээр улаан паспорт нь саад болж байна. Тиймээс цар тахлын үед стандарт бус шийдвэр гаргаж, топ 100 ААН-ийн захирал, хувьцаа эзэмшигчдэд ногоон паспорт гаргаж өгөөд эдийн засгийн хамтын ажиллагааг тэтгэх хэрэгтэй байна. Одоо бол дипломат албан паспорттой хүмүүст л гаднын Элчин сайдын яамдууд виз олгож байна.

Гаднаас хүмүүс ирдэггүй, иргэд нь гадагшаа явах боломжгүй үед энэ тал дээр анхаармаар байна. Олимпын хорооноос тамирчдад албаны паспорт өгдөг, төрийн шугамаар явж байгаа бүх хүмүүс албаны паспорт авдаг хэр нь хувийн хэвшлийнхэнд төрийн төмөр нүүр гаргадаг. Энэ тал дээр анхаарах хэрэгтэй байна. Ногоон паспорт гэхээр дээдсийн хэрэглэдэг зүйл мэт байдаг. Яг ийм хүнд үед хувийн хэвшлийнхнээ дэмжмээр байна.

Гадаад харилцааны сайд Б.Батцэцэг: Дипломат болон албан паспортыг төрийн өндөр алба хашиж байгаа хүмүүст олгодог олон улсын жишиг бий. Энэ дагуу Засгийн газрын тогтоолоор олгогдог. Өнгөрсөн жилүүдэд том татвар төлөгчдөд албан паспорт өгдөг болъё гэдэг санал яригдаж байсан.

Одоо бол журмын дагуу дипломат болон албан паспорт олгогдож байгаа. Олон улсын практикт бизнесийнхэн болон өвчтэй зовлонтой хүмүүст албан паспорт олгогддоггүй. Бизнесийнхэндээ яаж туслах вэ гэхээр бусад улс орнуудтай ойлголцсоны үндсэн дээр визийн хөнгөлөлт үзүүлэхэд чиглэж ажиллаж байна. Энгийн паспорттой иргэд 25 улсад визгүй зорчиж байгаа” гэлээ.