Г.Ёндон сайд аа огцорчихооч

УУХҮ-ийн сайд Г.Ёндон “Шок үүсгэхгүйн тулд иргэдэд дасгаж байгаад шатахууны үнийг нэмнэ” гэх утгатай үгсийг хэлж байна. Түүний ярьсан энэ асуудалд Засгийн газрын хуралдааны үеэр сайд нар санал нэгдсэн гэдгийг ч хэлсэн.

Тэгэхээр бид одоохондоо нөөцгүй гээд бухимдаж байгаа ч тун удахгүй үнийн хувьд чадалтай нь машинаа унаад, чадваргүй нь нийтийн тээвэр болон алхах арга хэмжээ авдаг болно.

Гэхдээ Г.Ёндон сайдын өөрийнх нь хэлснээр манай улс шатахууны хэрэглээгээ 100 хувь импортоор авдаг. Тэр ч утгаараа бүх бараа бүтээгдэхүүний үнэ нэмэгдэж, алсуураа иргэдийн худалдан авах чадваргүй үгүй болно.

Угаасаа шатахууны үнэ нэмэгдэхэд бусад бараа бүтээгдэхүүний үнэ нэмэгддэг нь манайдаа бол бичигдээгүй хууль болчихсон. Тиймээс ч улс шатахууны үнийг зах зээлийн зарчмаар сул орхих боломжгүй гэдгийг улстөрчид ч Засгийн газрынхан ч маш сайн мэддэг.

Шатахууны үнэ машинтай машингүй бүх хүний амьдралд нөлөөлдөг. Тэгвэл эрчим хүчний салбарыг төр өөрөөсөө түлхээд зах зээлийн зарчмаараа яв гээд орхивол хэрхэх вэ. Шатахууны үнэ ч бас үүнтэй агаар нэг.

Үнэхээр Г.Ёндон сайд энэ хэвээр стратегийн бүтээгдэхүүний үнийг ЗАХ ЗЭЭЛД даатгана гэж байгаа бол ёстой ГАЙ болохоор ЗАЙ болсон нь дээр шүү.

https://erennews.mn/article/50541