БНХАУ Австралийн нүүрсний импортод хориг тавьснаа албан ёсоор мэдэгдэв

БНХАУ Австралийн нүүрсний импортод хориг тавьснаа “албан ёсоор баталсан” хэмээн тус улсын төрийн мэдээллийн хэрэгслүүд мэдэгджээ. Хятадын Үндэсний хөгжил, шинэтгэлийн хорооноос өнгөрсөн амралтын өдрүүдэд эрчим хүчний томоохон 10 гаруй компанитай уулзаж, Австралиас бусад газраас нүүрс импортох зөвшөөрөл олгосон байна.

Эрх баригчид Монгол, Индонези, ОХУ-аас нүүрс импортлох тэргүүн чиглэлийг тавьж, эрчим хүчний компаниудад тонн тутмыг 640 юань /97.8 доллар/ -аас хэтрэхгүй байлгахыг санал болгожээ.

Хоёр орны маргааны улмаас Австрали улсаас БНХАУ-д нийлүүлэхээр ачсан нийт 700 гаруй сая ам.долларын үнэлгээ бүхий олон арван ачааны усан онгоц далайн боомт орчимд нүүрсээ буулгаж чадалгүй гацсан хэвээр байсан юм. Энэ хугацаанд Австрали, Хятадтай харилцаагаа сэргээхийг оролдсоор ирсэн боловч 11-р сард Бүсийн эдийн засгийн цогц түншлэл байгуулагдсан явдал, мөн энэ сарын эхээр Афганистан дахь Австралийн цэргүүдийн гэмт хэргийг дүрсэлсэн Хятадын гадаад хэргийн яамны албан тушаалтны бичсэн жиргээний дараа хоёр орны хоорондын харилцаа улам хурцадмал байдалд орсон юм.

Оны эхний арван сарын байдлаар Австрали улсаас Хятад улсад нийлүүлсэн нүүрсний хэмжээ 253.1 сая тн-д хүрч өнгөрсөн оны мөн үеэс 46.5 сая тонноор буюу -15.7%-иар буурсан байна. Харин Хятад улсын нүүрс олборлогч томоохон 90 компанийн нийт нүүрсний олборлолт оны эхний 10 сард 20.9 сая тонноор буюу 1%-иар нэмэгдэж 2.2 тэрбум тоннд хүрчээ.

Эх сурвалж: TheGuardian