Тусгаарлалтад байсан 14 иргэн хоолны хордлого авсан нь батлагджээ

Сидней-Сэбү-Улаанбаатар чиглэлийн тусгай үүргийн онгоцоор наймдугаар сарын 29-нд ирсэн 180 иргэнээс 13 том хүн, нэг хүүхэд хоолны хордлого авч, ХӨСҮТ-д хүргэгдсэн талаар өмнө мэдээлж байсан билээ. “Dream” зочид буудалд тусгаарлагдаж байх хугацаандаа хоолны хордогод орсон гэх эдгээр хүмүүсийн шинжилгээний хариу гарсан байна. Шинжилгээгээр хоолны хордлого болсон нь батлагджээ.

НМХГ-аас энэ талаар өмнө нь мэдээлэл өгсөн. Тус газрын Эрүүл мэнд, боловсрол соёлын хяналтын хэлтсийн дарга Д.Цэнд-Аюуш “Энэ сарын 14-нд “Dream” зочид буудалд тусгаарлагдаж байсан 15 хүнд хоолны хордлогын шинж тэмдэг илэрч ХӨСҮТ-д эмчлүүлж байна. Өнөөдрийн байдлаар хоол хүнсний дээжээс авсан лабораторийн сорьцын хариу гараагүй байна. Хоолны хордлого гарсан зочид буудлын хоол хүнсийг татан авч, үйл ажиллагааг нь түр хугацаанд зогсоосон” гэсэн юм.