Петрожамп, Тэс Петролиум, Синчи Ойл, Шунхлай зэрэг ШТС-уудын шатахуун хадгалах савнаас ус илэрсэн

Шударга өрсөлдөөн хэрэглэгчдийн төлөөх газраас Нийслэл дэх ШТС-уудаар хийсэн шалгалтын хариуг /2020.09.10/ өнөөдөр зарласан. Шалгалтаар  19 аж ахуй нэгж байгууллагын шатахуун түгээх станцуудыг хамруулж хэд хэдэн зөрчил дутагдал илрүүлсэн талаар мэдээллээ. Түүнчлэн хууль бусаар шатахууны жижиглэнгийн наймаа эрхэлж байсан зөрчил илрүүлсэн хэмээж байв.

Шалгалтаар “Магнай трейд”, “М Ойл”, “Содмонгол”, “Петровис”, “Петростар”, “Нью энержи Стар” зэрэг ШТС-уудын худалдаалж буй шатахуунууд бүгд стандартын шаардлага хангаагүй аж. Импортоор оруулж ирж буй шатахууны найрлагад хүхрийн агууламж өндөр хүнд төрлийн металь байгаа нь хүний эрүүл ахуй болон автомашины эд ангид сөргөөр нөлөөлөх эрсдэл өндөр байгаа тухай Мэргэжлийн хяналтын ерөнхий газраас /МХЕГ/тайлбарлаж байна.

Түүнчлэн “Тэс Петролиум ХХК”-ийн дизель болон АИ92 шатахуун, “Шунхлай ХХК”-ийн А95 шатахуун, “Синчи Ойл ХХК”-ийн А92 шатахуун, “Петрожамп ХХК”-ийн А92 шатахуун зэрэг ШТС-уудын бензинээс ус болон лаг илэрчээ.

МХЕГ-аас энэ тухай тайлбарлахдаа “Шатахууны саванд удаан хугацааны туршид цэвэрлэгээ, ариутгал хийгээгүйгээс болоод урвалд орон конденсац үүсдэг. Тийм учраас шатахууны наймаа эрхлэгч аж ахуйн байгууллагууд шатахууны цэвэрлэгээ хийж хэрэглэгч, үйлчлүүлэгчдэд цэвэр шатахуунаар үйлчлэх ёстойг анхаарч ажиллана уу” хэмээн сануулга өгсөн.