Оросын сөрөг хүчний удирдагч Алексей Навальныйг ямар нэг химийн бодисоор хордуулсан гэх дүгнэлт гарчээ

Оросын сөрөг хүчний удирдагч Алексей Навальный өнгөрсөн долоо хоногт орон нутгийн онгоцоор зорчиж явахдаа ухаан алдаж, эмнэлэгт хүргэгдсэн билээ. Омск хотын эмнэлэгт хүргэгдсэн улстөрчийг хордуулсан гэж сэжиглэж байв. Бямба гарагт түүнийг эмчлэхээр Герман руу авч явсан юм. Оросын талын эхний шинжилгээгээр Навальныйг хордуулаагүй гэсэн дүгнэлт гарсныг Кремлийн төлөөлөгч зарлаж байв. Харин өчигдөр буюу Даваа гарагт Германы эмч нар түүнийг “cholinesterase inhibitor” бүлгийн ямар нэг химийн бодисоор хордуулсан гэх дүгнэлтийг гаргажээ. “Cholinsterase inhibitors бүлэгт багтах ямар нэг бодисоор хордуулсныг нь шинжилгээний үр дүнд тогтоолоо. Яг ямар бодис болох нь тодорхойгүй байна. Илүү нарийвчилсан шинжилгээнүүдийг эхлүүлсэн” гэж Навальныйд үзлэг хийсэн эмч нарын баг мэдэгдсэн байна.

Одоогоор Навальныйн амь насанд шууд аюул учруулсан зүйл байхгүй ч урт хугацаандаа эрүүл мэндэд нь сөргөөр нөлөөлж болохыг эмч нар бас анхааруулжээ.  Шинжилгээний дүгнэлт гарсны дараа Германы канцлерь Ангела Меркель улстөрчийг хордуулсан хэргийг шалгаж, буруутай этгээдийг илрүүлэн хуулийн хариуцлага тооцохыг Оросын талд уриалжээ. “Cholinesterase inhibitor” нь химийн зэвсгээс эхлээд шавьжны хоронд хүртэл ашигладаг химийн бүлэг бодис юм байна.

Германы эмч нар Навальныйг атропин хордлогын эсрэг үйлчилгээтэй эмээр эмчилж байгаа гэнэ. 2018 онд Английн Солсбэрид тагнуулын ажилтан асан Сергей Скрипалийг охин Юлиягийнх нь хамт химийн бодисоор хордуулахад бас ийм эмээр эмчилж байжээ. Алексей Навальный сүүлийн арав гаруй жилийн хугацаанд Кремлийн бодлогыг хүчтэй шүүмжлэгч байсан юм. Тэрбээр энэ хугацаанд албан тушаалтнуудын авлигатай холбоотой баримтуудыг дэлгэж, эсэргүүцлийн жагсаал цуглаан зохион байгуулдаг байв. Навальный үүнийхээ төлөө олон удаа баривчлагдаж, шийтгүүлж байжээ. Түүнийг 2018 оны ОХУ-ын ерөнхийлөгчийн сонгуульд нэр дэвшихийг нь хориглож байв.

Эх сурвалж: Reuters