Монгол жолооч нартай зохисгүй харьцсан Хятадын хэв журам сахиулагчдад хариуцлага тооцохоор болжээ
Нүүрс тээврийн жолооч нартай Хятадын хэв журам сахиулагчид зохисгүй харьцаж байгаа бичлэг олон нийтийн сүлжээнд тарсан билээ. Хил давсан жолооч нар Ганц мод боомтод 270 юанийн зардал төлөн нэг хоног хонох боломжтой. Харин энэ үеэр буудлын гадна монголчуудыг эгнээн жагсааж, явган суулгаж байжээ.
Тэгвэл Гадаад харилцааны яамнаас гаргасан мэдээллээр энэ зохисгүй үйлдэлд Элчин сайд Чай Вэньруй арга хэмжээ авахаар болжээ. ГХЯ-ны мэдээлэл бүрэн эхээрээ:
Гашуунсухайт-Ганцмод боомтоор нүүрсний тээвэр хийж буй жолооч нар Ганцмод боомтод хоноглох үеэр нь Хятадын талын хэв журам сахиулах ажилтнууд жолооч нарт хүндэтгэлгүй хандсан тохиолдол наймдугаар сарын 18-ны орой гарсантай холбогдуулан Гадаад харилцааны яамны Хөрш орнуудын газрын захирал Т.Батцэцэг БНХАУ-аас Монгол Улсад суугаа Элчин сайд Чай Вэньруйтай утсаар ярилцав.
Хоёр талаас тохиролцсон “Ногоон гарц”-ын түр журмын дагуу тээвэр хийж буй монгол иргэдэд хятадын талын холбогдох байгууллагын хүмүүс хүндэтгэлтэй хандах ёстой. Хоёр улсын харилцааны найрсаг уур амьсгалд сөргөөр нөлөөлөх ийм тохиолдол дахин гаргахгүй байхад анхаарч, зохих арга хэмжээ авахыг Хөрш орнуудын газрын захирал Т.Батцэцэг Элчин сайд Чай Вэньруйгаас хүсэв.
Монголын талаас анхаарал хандуулж буй асуудлыг хятадын талын холбогдох байгууллагад мэдээлж, арга хэмжээ авахаа Элчин сайд Чай Вэньруй илэрхийлэв.
Монгол Улсаас Хөххотод суугаа Ерөнхий консул С.Батхуяг мөн асуудлаар БНХАУ-ын ӨМӨЗО-ны холбогдох албаны хүмүүстэй ярилцахад дахин ийм асуудал гаргахгүй байхад анхаарч, арга хэмжээ авахаа илэрхийлсэн байна. Үүний зэрэгцээ онцгой нөхцөл байдалд тогтсон маршрутаас өөр газар явж болохгүйг жолооч нарт ойлгуулахад монголын тал анхаарахыг хятадын талаас хүссэн байна. С.Батхуяг консул ӨМӨЗО-ны Боомтын албаны хүмүүстэй түүнчлэн жолооч нарын зочид буудлын нөхцөл, хоолны чанарыг сайжруулах, буудлын төлбөрийг бууруулах асуудлыг ярилцжээ.
URL:
