Улсын начин Б.Бадрал гэр бүлийн гишүүдийн хамтаар усанд урсан амиа алдсан харамсалтай хэрэг гарчээ

Онцгой байдлын газраас өгсөн мэдээллээр Хөвсгөл аймгийн Улаан-Уул сумын Шивлэг багийн нутаг, Бэлтэсийн ам дахь Бөштигийн рашаанаас сумын төв рүү автомашинаар зорчиж явсан иргэд өнгөрсөн лхагва гаригт Бэлтэсийн голын усанд живсэн гэх мэдээлэл гарсан билээ.

Тэгвэл энэ ослоор Монгол Улсын начин Б.Бадрал гэр бүлийн бусад гишүүний хамтаар харамсалтайгаар амиа алдсан байна.

Эх сурвалжийн мэдээллээр, тэрбээр жирэмсэн охиноо түрүүлэн уснаас гаргаад эргэж эхнэр хүүхдүүдээ авахаар усанд ороод эргэж гарч ирээгүй аж.

Тэдний сууж явсан “Ланд круйзер-80” автомашинд 4-49 насны зургаан хүн сууж явсан байна. Автомашин урсах явцад 26 настай, хөл хүндтэй бүсгүй машинаас бууж амжсан бөгөөд явганаар гол гатлан нөгөө эрэгт нь гарсан гэнэ.
Улмаар Хатгал тосгоны Онцгой байдлын хэлтэст дуудлага өгсөн аж. Үүний дагуу Хөвсгөл аймгийн Онцгой байдлын болон Цагдаагийн газрын алба хаагчид, ЗДТГ-ын ажилтнууд долдугаар сарын 17-нд ослын газарт очжээ.

Ингээд тухайн өдрийнхөө 09.40 цагт дөрвөн настай Т-ын цогцсыг автомашины тээшнээс гарган авсан гэнэ. Мөн ослын цэгээс 6-13 км-ийн зайтай газраас 49-тэй Б, 48-тай С, 20-той Б, 10 настай Б-гийн цогцсыг олж, цагдаагийн байгууллагад хүлээлгэн өгсөн байна.