Авлигын хэрэгт холбогдсон Самсунгийн өв залгамжлагч олон нийтээс уучлалт хүслээ

Өмнөд Солонгосын эдийн засгийн 15 орчим хувийг бүрдүүлдэг Самсунг Группын дэд ерөнхийлөгч Ли Жэ Ён өчигдөр хэвлэлийн хурал зохион байгуулж, олон нийтээс уучлал гуйжээ.

Ли Жэ Ён компанийн удирдлагын эрх мэдлийг гартаа лав оруулахын тулд Өмнөд Солонгосын экс ерөнхийлөгч Пак Гюн Хэд авлига өгч, шийдвэр гаргахад нөлөөлүүлсэн хэргээр 2017 онд шүүгдэж, хэдэн сар хоригдсоны эцэст 2018 онд суллагдсан. Самсунг группын нээлттэй компаниудад Өмнөд Солонгосын тэтгэврийн сан хөрөнгө оруулсан байдаг тул засгийн газар удирдлагын томилгоонд чухал нөлөөтэй байдаг юм.

Тэрээр Самсунгийн ерөнхийлөгч Ли Кун Хэгийн ууган хүү, гол өв залгамжлагч юм. Эцэг нь зүрхний өвчний улмаас 2014 оноос эхлэн хэвтэрт байгаа бөгөөд залуу Ли тэр цагаас хойш үндсэндээ группээ удирдаж байгаа.

Тиймээс өчигдрийн хурлын гол агуулга нь өмнөх алдааныхаа төлөө олон нийтээс уучлал гуйж, компанийн засаглалыг сайжруулах амлалт өгөв. Самсунг Группын удирдлага өнгөрсөн хугацаанд нийгэмд зөв үлгэр дууриал болохоор ажиллаж чадаагүйг хүлээн зөвшөөрсөн Ли Жэ Ён компани дотроо үйлдвэрчний эвлэл байгуулахыг зөвшөөрч, засаглалыг гэр бүлийн өмч болгохгүй гэдгээ амлажээ.

“Ажил үүргээ өөрийн үр хүүхдүүдэд залгамжлуулах төлөвлөгөө надад байхгүй. Би энэ байр сууриа эртнээс олон нийтэд ил тод зарлах бодолтой байсан ч боломж гарсангүй өнөөдрийг хүрлээ. Бизнесийн нөхцөл байдал хүнд хэцүү байснаас гадна би өөрөө ийм мэдэгдэл хийх хүн гэдгээ батлан харуулахад цаг хугацаа шаардлагатай байсантай холбоотой” гэж Ли Жэ Ён мэдэгджээ.

Самсунг Группын хараат бус ёс зүйн хороо түүнийг олон нийтээс уучлал гуйх хэрэгтэй гэсэн зөвлөмжийг энэ оны эхээр гаргаж байсан юм. Гэвч коронавирусийн цар тахлын улмаас төлөвлөгөө хойшилсоор өчигдөр хэрэгжжээ.