ГЕГ: Адууны өлөн гэдэс хууль бусаар хилээр гаргах гэж байсныг илрүүлсэн

Адууны өлөн гэдэс хууль бусаар хилээр гаргах гэж байсныг гаалийнхан илрүүлжээ. Тодруулбал, Замын-Үүд дэх гаалийн хяналтын бүсээр Монгол Улсын иргэн Б, Э нар жолоодож явсан чингэлэг ачсан ачааны автомашиныхаа гурван хэсэгт хуваан 20 шуудай нийт 560 кг адууны өлөн гэдэс нууж улсын хилээр хууль бусаар нэвтрүүлэх гэж байсан үйлдлийг гаалийн байгууллага илрүүлсэн шалгаж байна.

Адууны өлөн гэдэс нь тарифын бус хязгаарлалттай бараанд тооцогддог байна.

Энэ нь ЗӨРЧЛИЙН ТУХАЙ хуулийн 11.21.11-д Тарифын болон тарифын бус хязгаарлалт тогтоосон барааг энэ зүйлийн 1 дэх хэсэгт заасан аргаар гаалийн хилээр хууль бусаар нэвтрүүлсэн, эсхүл нэвтрүүлэхийг завдсан бол тухайн зөрчилд холбогдох барааг хурааж, эсхүл үнийг гаргуулж хүнийг нэг зуун нэгжтэй тэнцэх хэмжээний төгрөгөөр, хуулийн этгээдийг нэг мянган нэгжтэй тэнцэх хэмжээний төгрөгөөр торгох арга хэмжээ  авах заалттай аж.