Эротик уур амьсгалгүй, үзэгчдийг хөгжөөх зорилгоор л тайчсан

Инээдмийн болон бусад кинонд чадварлаг тоглодог, авьяаслаг, тааварлашгүй жүжигчин Сандра Баллоктой хийсэн ярилцлагыг орчуулан хүргэе.

-Өнгөрсөн жилүүдэд танд эерэг, сөрөг олон үйл явдал тохиолоо. Оскар, салалт, хүү­хэд өргөж авсан гээд л. Ийм эрчимтэй өөрчлөлтөд бэлэн байсан уу?

-Мэдээж. Би юунд ч батал­гаа байхгүй гэдэгт ит­гэдэг. Амьдрал урьдаас төлөв­лөгдсөн хөтөлбөрөөр явдаг­гүй, үргэлж хувьсан өөрч­лөгддөг. Тиймээс амьд­ралд тохиох бүхий л зүйлд бэлэн байх хэрэгтэй.

-Урьдчилж таамаглахын арга­гүй зүйл танд түгшүүр тө­рүүлдэг үү?

-Би муу юм болно гэж бод­доггүй, амьдрал ураг­шилж байгааг л хардаг. Өөдрөг үзэлтэн. Амьдралын эрээн бараан үе цагаанаар солигд­дог, цагаан нь мөнх үргэлж­лэхгүйг мэддэг. Бүх зүйл таамаглахын аргагүй гэдгийг миний амьдрал батална. Олон жилийн өмнөөс хянаж болохгүй зүйлийг зохицуулахаа боль­сон. Би зөвхөн цаг үедээ л тааруулан сонголт хийдэг. Жүжигчний хувьд зураг авахуулах төсөл, амьдралдаа оруулах эрчүүд гээд л. Харин одоо хянаж, зохицуулалгүй, сонгодог болсон.

Явдаг байшинтай /дугуй­тай, чиргүүл маягийн гэр орон/ нэгээс нөгөө рүү нүүж амьдардаг хүмүүст би бага зэрэг атаархдаг шүү. Тэд нийгмийн өмнө хүлээх үүрэг, хариуцлагаа ямар нэгэн хэмжээгээр үгүйс­гэдэг бөгөөд амьдралын өөрч­лөлтөд зохицон орш­дог. Харин миний хувьд Америкийн “стиль лайф” буюу амьдралын хэв маяг холилд­сон. Хөрөнгөө хуримт­луулах, ипотек дарах, 30 жилийн урьдаас төлөвлөх гээд л.

-45 настайдаа анх нүц­гэн зур­гаа авахуулсан та үнэ­хээр зоригтой бүсгүй шүү?

-Тийм ээ, үнэхээр тийм. Хам­­гийн анх “Санал” кинонд нүцгэлэхдээ 45 нас хүр­сэн байлаа. Гэхдээ би үүнийг тачаангуй зураг авалт гэж үзэхгүй, яагаад гэ­вэл тэр инээдмийн кино. Тэнд ямар ч эротик уур амьс­гал байхгүй, үзэгчдийг хөг­жөөх л зорилготой. Энэ нүц­­гэ­лэлтэд хүмүүсийн хөх инээдийг барах ямар ч муу­хай зүйл байхгүй. Учир нь би насан туршдаа биеэ төгс бол­гон хөгжүүлж бай­гаа. Ба­летаар хичээллэж, спорт зааланд бэлтгэл хийж, дас­галын курст яв­даг. Бие хаа бол дүр бүтээх чухал хэрэг­сэл.

-Нөхрөөсөө салах үедээ хүүхэд өргөж ав­сан. Өрх толгойлсон ээж боллоо, бас хүний хүүхэд хэцүү гэж айгаагүй юм уу?

-Үгүй ээ. Би өөрийн төр­сөн хүүхдийг ч генүүдийн санам­саргүй сонголт, хро­мосомуудын өвөрмөц “тог­лоом” гэж боддог. Зөвхөн төрсөн хүүхэд л таны хам­гийн дотно хүн байна гэсэн баталгаа байхгүй. Энэ бол нөр их хөдөлмөр. Ер нь төрсөн эцэг, эх нь хэн байх огтхон ч чухал биш.

Би хайрыг тээж, төрүүлж болно гэж боддоггүй. Хайр гэдэг ээдрээтэй зүйл. Луисыг дөнгөж гурван сартай байхад нь өргөж авсан. Тиймээс надад боломж байна гэж бодсон. Хүүхэд өргөж авах нь хайрын баталгаа, байгаагаа хуваах гэсэн оролдлого юм. Өөрт илүү байгаа, бусдад хүрэлцэхгүй байгаагаа өгнө гэсэн үг. Тодорхой насанд хүрээд хэзээ нэгэн цагт үхнэ гэсэн бодол танд төрнө. Тэр үед өөрөө юу үлдээж, дэлхий ертөнцтэй юугаа хуваалцах вэ. Залуудаа бид бүгд бардам, хувиа хичээгч байдаг болохоор ертөнцөөс зөвхөн авахыг хүсдэг. Харин одоо надад энэ сонирхолгүй. Одоо би олох, авахыг эрмэлзэхээ больсон. Харин хуваах, өгөхийг хүсч байна. Үхлийг би авах, гээхийн ухаан, амьдралыг бүрэн мэдрэх хүч хэмээн үздэг болсон.

-Гэрлэлтийг үргэлж эсэр­гүүц­дэг хэрнээ та 40-тэйдээ хүнтэй сууж, урвалт гэж юу болохыг мэдэрсэн байх?

-Жессийн араар тавилт намайг хамгийн ихээр айл­гасан. Хүнтэй суусан нь миний алдаа байсан гэж бод­дог байлаа. Харин дараа нь ямар ч алдаа гаргаагүйгээ ухаарсан.

Жесси бол гоц гойд хүн. Түүний авьяас билиг анх уулзсан мөчөөс эхлээд миний сэтгэлийг татсан. Жесси мотоцикл, техникийн улаан хорхойтон. Ер нь түүний сонирхол ер бусын анхаарал татам. Гэр бүлийн амьдралын хэдэн жилд маш сонирхолтой хүнтэй хамт цагийг өнгөрөөсөн гэж би боддог. Гэрлэхийн тулд тэр тодорхой хохирол амссан. Алдартай хүний нөхөр болсноор тэр олны анхааралд байнга өртөж, улмаар сэтгэл санаанд нь нөлөөлсөн биз. Хэрвээ би алдартай байгаагүй бол Жесситэй уулзсан охин нууц харьцаагаа хэвлэлээр цацах байсан гэж үү. Үүнийг би удаан хугацааны туршид мэдрээгүй явжээ.

-Эрчүүдийн талаар танд хэн нэгэн зөвлөдөг үү?

-Хью Грант гэдэг сайн найз, багш надад бий. Тэр бол гайхалтай цэцэн эр. Оскарын ёслолын үеэр бид рес­торанд цуг ортол бүх эмэгтэй бухимдсан гээд бод доо. Тэд бүгдээрээ шоу биз­несийн ертөнцөд хөл тавьсан бүсгүйчүүд байсан. Би Хьюгээс “Бүсгүйчүүд ийм байгаа үед чи юу хийдэг вэ?” хэмээн асуусан. Тэр “Хэдэн үг хэлчихдэг” хэмээн хариуллаа. Сонирхол төрөөд “Жишээ нь” гэж лавлахад тэр над руу анхааралтай хараад, “Чинийх шиг сайхан хүзүүг би өмнө нь харж байсан” гэсэн шүү. Би ч шударгаар “Энэ бол миний мэдэх хамгийн муухай доромж­лол” хэмээсэн. Гэтэл Хью “Ийм үгийг зөвхөн секс хандлагаар таныг сонирхсон хүмүүст л хэлэх хэрэгтэй. Тэгвэл тэд өөрөөр харьцаж эхэл­нэ” гэдэг байгаа.

Би ч мөчөөгөө өгөлгүй, “Харин чамаас харц сал­гах­гүй ширтсээр байгаа эмэг­тэй­чүүдийг яах вэ?” гэж асуу­тал Хью “Тэднийг чөт­гөр аваг” гэсэн шүү. Ер нь ийм л сур­гамж өгдөг хүн дээ.

-Таны хувьд хайр гэж юу вэ?

-Хайр уу. Өөрийнхөө төлөө бус, хайрласан хү­ний­хээ төлөө амьдрахын нэр. Бас түүнийгээ жаахан шарх­луулахад ч аймшигтай байхыг хэлнэ.