5.5 тэрбум төгрөгтэй 76 гишүүнтэй тэрбумтнууд л өрсөлдөнө
2012 онд Монгол Улсыг 76 хүн л хувааж идэхээр боллоо.
Идэх идэхдээ Сонгууль нэрийн дор өнгөрсөн жилүүдийнхээс ихээхэн хөрөнгө хаяж, ард түмний толгойг эргүүлэх ажилдаа хэдийнэ орцгоожээ.
Бас хажуугаар нь Сонгуулийн хуулиа өөрсдөдөө зориулаад гаргачихлаа. Ёстой л чадаж байгаа юманд арга байхгүй гэдэг байдлаар татвар төлөгчдийн мөнгөөр дураараа дургиж, дунд чөмгөөрөө жиргэж сууцгаана.
Ялангуяа 2012 оны төсвийг батлахдаа маш их танаж, хямгадлаа хэмээн баруун солгойгүй дуугарч байсан эрхмүүд ханцуй дотроо хоёр тэрбумыг сэмхэн халаасалж, ард түмнийг сохор, дүлий гэж басамжлаад амжив.
Анх 2000 оноос эхэлсэн 500.000-ын хуваарилалт 2008 онд 500 сая болж, улмаар нэг тэрбумын хэмжээнд хүртлээ хадуурсан. Ингэж татвар төлөгчдийн мөнгийг тойрогтоо бүтээн байгуулалт хийх нэрийдлээр шоу хийдэг УИХ-ын гишүүдийн башир арга нарийсч, 2012 онд гурван тэрбум төгрөг хүртлээ өслөө. Хэдийгээр 2012 оны төсвийг батлах гэж ёстой шар махтайгаа хатан, үйлээ үзэж, үсээ зулгаалаа хэмээсэн төсөв нь эрхэм гишүүдийн сонгуулийн сурталчилгаанд зориулагдах болсон нь тун гайхалтай.
Гэхдээ дээрх мөнгийг УИХ-ын 76 гишүүн шууд өөрсөд дээрээ хуваарилж нэр зоосонгүй. Харин төсөв ерөнхийлөн захирагчид болох Засаг дарга нартаа хуваарилсан нэрийдлээр өөрсдийн сонгуулийн шоуны хөрөнгийг яамдуудын төсөвт суулгасан. Нүүрэн дээрээ нэг тэрбумыг орон нутгийнхаа хөрөнгө оруулалтад хандивласан нэртэй мөртлөө гурван тэрбум төгрөгөөр дөрвөн жилийнхээ нүүрийг тахлах ажилд тусгуулж орон нутаг руугаа шилжүүллээ.
Эцсийн дүндээ ингэж татвар төлөгчдийн мөнгөөр тойрогтоо сонгуулийн шоу хийх санааг хамтарсан Засгийн газарт суугаа түрийвч, халаас, хөнжил нэгтэй МАНАН бүлэглэлийнхэн гардан зохион байгуулж, хулгайч нохой шиг аашилсан нь энэ.
Түүгээр ч зогсохгүй Сонгуулийн хуулиа өөрсдөдөө зориулан гаргаж, нэр дэвших босгыг өндөрсгөөд дөрвөн жилийн хугацаанд 5.5 тэрбум төгрөг халаасалсан УИХ-ын гишүүдтэй ирэх сонгуульд өрсөлдөнө гэдэг ихээхэн иргэний зориг, дундаршгүй их хөрөнгө хүч шаардагдах бололтой. Тэр ч утгаараа өрсөлдөхөд өвдөг чичирмээр нөхөдтэй 2012 онд ана мана, ач тач үзэлцэнэ гэдэг ихээхэн хүндрэлтэй байх нь хэн хүнд ойлгомжтой.
Ялангуяа 5.5 тэрбум төгрөгөөр дөрвөн жил улстөр хийсэн 76 гишүүнтэй ирэх сонгуульд тэрбумтан ч өрсөлдөхөд хэцүү болно.
Ард түмний мөнгийг өөрсдийгөө сурталчлахад зориулж, тэр мөнгөөр нь сонгууль хийж байгаа УИХ-ын 76 гишүүний энэ мэт явуургүй байдлыг таслан зогсоох цаг болжээ. Өөрсдийнх нь баялгийг зарж олсон мөнгөөрөө ингэж сонгуулиа хийж байгаа улстөрчдийг ард түмэн ажил хийсэн гэж ойлгохоос ар хударгаараа төрийн мөнгөөр, татвар төлөгчдийн мөнгөөр сонгууль хийж байгааг хойд ууланд хонь хариулж байгаа Дондог өвгөн хэрхэн мэдэх билээ дээ. Ёстой л чадаж байгаа юманд арга байхгүй гэгчээр хандаж байгаа улстөрчдийн амин хувиа хичээсэн УИХ-ын 76 гишүүн нэртэйгээр нь Монгол Улсын хаанаар өргөмжлөгдлөө. Ингэж болно гэж үү.
Харин ингэж эрээ цээргүй татвар төлөгчдийн мөнгийг улс эх орны бүтээн байгуулалтад зарцуулж байна хэмээн хэнхдэг цээжээ балбаж суугаа эрхэм улстөрчид Сонгуулийн хууль, 2012 оны төсвийн хуваарилалтаараа Монгол Улсыг тэр чигээр нь хуваагаад идчихлээ шүү дээ.
URL:
