Ардчилсан намынхан алаагүй баавгайн арьсыг хуваагаад завгүй

2012 оны сонгуульд өөрсдийгөө ялна гэж зарлаад байсан АН-ынхан да­раагийн намын дарга, Ерөн­хий сайд хэн  байх вэ гэдэг цусгүй тулааныг эхлүүлж, алаагүй баавгайн арьсыг хуваагаад завгүй байцгаана.
Ялангуяа УИХ-ын гишүүн З.Энхболдын санаачилгаар байгуулагдсан Ардчилсан хүчний холбоо, ЗТБХБ-ын сайд Х.Бат­тулгын толгойлдог МоАХ-ныхон нэгдээд Ал­тан­гадас фрак­цийн эсрэг баруун сол­­гойгүй дайралт хийж, Н.Ал­тан­хуягийг гарах гарц­­­гүй бол­гохоор бу­ланд ша­хах оролд­логыг хийц­гээж байна.
УИХ-ын гишүүн З.Энхболдын хувьд өмнөх ҮЗХ-ны хурлаар намын даргын суудлын төлөө өрсөл­дөөд өвдөг шороодож байсан. АН дотроо цэвэрхэн нэртэй, тэр ч утгаараа намдаа хүлээн зөв­шөөрөгдсөн лидер хэмээгд­дэг тэрбээр хамтарсан Зас­гийн газрын эсрэг байр сууриа илэрхийлсэн ч тө­дийлөн үр дүнд хүрээгүй.
АН-ын даргынхаа үйл ажил­лагаанд тааламжгүй ханд­дагаа илэрхийлж, ҮЗХ-ны хурлаар нэрээ дэвшүүлсэн ч бас л явсангүй.
Харин өдгөө УИХ-ын гишүүн ЗТБХБ-ын сайд Х.Бат­тулга хэвлэлээр өөрийгөө намын дарга гэж хэлэх нь холгүй зарлаж, УИХ-ын гишүүн З.Энх­бол­дын үйлдлийг давтах болов.
Гэтэл нийгэм ЗТБХБ-ын сайд Х.Баттулгын эл үйлдлийг өөгшүүлж эхэл­лээ. Ямартаа л өөрийнхөө эзэмш­лийн хэвлэл мэ­дээллийн хэрэгс­­лээр Ардчилсан на­мын дарга Н.Алтанхуягаа ком­му­нис­­туудын өвөрт орчих­сон ян­хан мэ­тээр баруун сол­гой­гүй до­ром­жилж эхлэх вэ дээ.
Энэ тухай ЗТБХБ-ын сайд Х.Баттулга өөрийн эзэмшлийн сониндоо “76:5 буюу хамтарсан Засгийн газарт өтлөхөөр шийдсэн Н.Ал­тан­хуяг дарга” хэмээн онц­лон шүүмжлүүлсэн байв.
Уг нийтлэлд “Ардчилсан нам эрийн цээнд хүрч, төр барихуйц нам болж чадсан. Хам­тарсан Засгийн газарт гурван жил тогтвортой ажил­лаж, төрийн бодлого тодорхойлоход оролцож байна. Дараагийн удаа АН дангаараа төр барих ёстой” хэмээн салан тусгаарлалтаа олон нийтэд дэндүү ил тодоор зарлажээ.
Түүгээр ч зогсохгүй  АН эрийн цээнд хүрч, ард түм­ний итгэл даахаар болсон эсэхийг ирэх сонгууль л шүүх ёстой гэж үг дайхаа ч мартсангүй.
Энэ утгаараа АН-ынхан ирэх сонгуульд ямар ч бай­сан ялна гэдэг бат итгэл­тэй байх шиг. Гэхдээ л АН ирэх сонгуульд МАН-тай хамтрахаар болж, бүр дөр­вөн жилийн гэрээ бай­гуул­чихсан гэдэг мессэж тараа­гаад ч хагарсан, цуурс­наа эвээр үзэх гэж учир зүйгээ олж чадахгүй байгаа нь өрөвдөлтэй ч юм шиг.
Ийнхүү АН-ынхан хөнжил дотроо хөлөө жийл­цэж, 2012 оны сон­гуульд ялах нь тодорхой бол­лоо гэж алаагүй баавгайн арьсыг энд тэндээс нь зул­гааж, нийгэмд онцгойрох гэж оролдох боллоо.
Харин АН-ын томчуудын тэм­цэл­дээн жирийн гишүүдийн хувьд үнэхээр өрөв­­дөлтэй, арга ядсан хараг­дах нь ойлгомжтой. Тийм ч болохоор хэд хоногийн өмнө манай сонины ¹ 234 дугаарт АН-ын ҮЗХ-ны гишүүн Т.Бат-Эрдэнэ до­тоод хага­ралдаанаа харж тэв­чил­гүй “амбицаа дар” гэсэн нөхөрсөг зөвлөгөөг удирд­лагууддаа дайж билээ. Тэр энэ үгийг зүгээр ч нэг хэл­чихээгүй биз.
Харамсалтай нь “Жин­гийн цуваа явдгаараа явж, жин­гэр нохой хуцдагаараа хуцна” гэдэг шиг намын гишүүдийн үзэл бодол, байр суурь алаагүй баавгайн арьсыг зулгаалцаж байгаа нөхдөд түй ч падлий алга бололтой.
Тэгвэл АН-ын гишүүдийг өвөртөлж чадсан МАН иймэрхүү амбицыг дарах тал дээрээ тун чадварлаг. Намын зохион байгуулалтаас эхлээд диктатур чангатайн адилаар иймэрхүү үзэгдэл гарахад тун яаралтай арга хэмжээ аваад нам дарж чаддагаараа АН-аас давуу байж ирсэн. Арга ч үгүй, 90 жилийн түүхтэй нам хойно, энэ зэргийн дотоодын самууныг дарах чадвар  байж л таарна. Харин 20 настай АН-ханд  толгойлогчоо егүүтгэхээс өөр ойлгомжгүй байдлаас мулт­рах арга одоохондоо алга бололтой.