Халаагаа өгсөн З.Энхболд юу хэлэв?

АН-ын 7-р их хурал хот, хөдөөгийн гишүүдийнхээ хамтаар өргөн бүрэлдэхүүнтэй өрнөж байна. тус намын үдээс өмнөх хуралдаанаар АН-ын шинэ дарга С.Эрдэнэд тамгыг нь гардуулан, намын даргаар албан ёсоор батламжилсан юм. Их хурлын индрээс АН-ын шинэ, хуучин дарга нарын хэлсэн үгийг хүргэж байна.

АН-ын дарга асан З.Энхболд: АН-ын дахин эрх баригч болгохын төлөө хамтран зүтгэнэ

Ардчилсан хувьсгалын тугийг өргөж явсан, ардчилал эрх чөлөө шударга ёсыг эрхэмлэгч журмын нөхөддөө баяр хүргэе.Ардчиллын төлөө тууштай тэмцэж, шинэчлэлийг хөгжүүлж чадсан мянга, мянган гишүүд, их хуралдаа ирсэн гишүүддээ талархаж байна. Ардчилсан нам УИХ сонгуульд цөөнх болсон хэдий ч алдаа дутагдалдаа үнэлэлт дүгнэлт өгч, өөрчлөлт, шинэчлэлийг хийж байна. Олигарх, оффшорчдоосоо салж чадсан Ардчилсан намын гишүүддээ талархал илэрхийлье. Ардчилсан намыг дахин эрх баригч хүчин болгохын төлөө З.Энхболд миний бие хамтран зүтгэх болно. Ардчилсан дарга С.Эрдэнийг 2020 оны УИХ-ын сонгуульд ялалт авчрахыг ерөөе.

Ардчилсан намын дарга С.Эрдэнэ: Монголын ардчилалыг авч явах шалгуур ирээд байна

1989 оны жавар тачигнасан өвлөөс эхлэн та бид ардчиллын үнэт зүйлийнхээ төлөө тэмцлээ. Өөрчлөн байгуулалтыг хийх түүхэн замналыг туулахад амар хялбар байгаагүй. Ардчиллын үнэт зүйлийн төлөө тэмцэж явсан олон журмын нөхөд маань өнөөдөр алга. Бид өнөөдөр түүхэн шалгуурын өмнө ирчихээд байна. Монголын ардчиллыг авч явах хариуцлага, шалгуур ирээд байна. Монголын хөгжлийн бодлогыг тодорхойлох улс төрийн хариуцлага дээр ирчихээд байна. Өнөөдрийн эрх баригч хүчин монголчуудын хүсэн хүлээж байгаа ардчилал, хүний эрх чөлөө, улс орны хөгжлийг авч явах бодлого байхгүй юм байна гэдгийг бид хангалттай харлаа. Бид ардчиллын салхийг хагалж, нэг намын дарангуйлал тогтсон харанхуй нийгмээс улсаа гаргаж чадсан улстөрийн хүчин. Цаашид ч түүчээлэх үүрэг Ардчилсан намд хэвээр байгаа юм байна гэдгийг харж байна. Хөгжлийг түүчээлэх үүргээ биелүүлэх болно гэдгийг хариуцлагатайгаар хэлье. Та нарынхаа захиа даалгаврыг биелүүлж, ажиллана. Ахмад, залуу, дунд гурван үеийн төлөөллийн хэлхээсийг хангаж, эмэгтэйчүүдийн жендэрийн тэгш байдлыг хангасан үйл ажиллагаа явуулах болно. Ардчилсан нам шинэчлэгдэхийн хэрээр Монгол улс хөгжинө. Монголчуудын хүсэн хүлээсэн нийгмийг Ардчилсан нам авчирч чадна. Бүх шатны сонгуульд ялалт байгуулахын тулд асар их үүрэг хариуцлага хүлээж байгаа. Хамтаараа Ерөнхийлөгчийн сонгуульд ялалт байгуулах болно. 2020 оны УИХ ын сонгуульд ялах болно. Би Ардчилсан намын 180 мянган гишүүндээ итгэж байна, би Монголын ард түмэнд итгэж байна.

Нийслэлийн АН-ын дарга Э.Бат-Үүл: Коммунист нам байснаа нуудаг МАН хэзээ ч ийм сунгаа явуулж чадахгүй

С.Эрдэнэд өмнөх намын даргаас илүү эрх мэдэл, итгэл найдвар очиж байгаа. Монголд хэзээ ч урьд өмнө ийм олон гишүүдийнхээ саналаар намын дарга болсон жишиг байхгүй, С.Эрдэнэ анхдагч нь. Монголд ийм сунгаа хийж чаддаг нам хаана ч байхгүй. Коммунист нам байснаа нууж явдаг МАН хэзээ ч ийм сунгаа хийж чадахгүй. Компанийн нам болж байсан нам хэзээ ч ийм сунгаа хийж чадахгүй. Бүс нутагт ч ийм нам байхгүй гэдгийг бардам хэлж чадна. Бидний өмнө улс төрийн том зорилго тавигдсан. Олигархын тогтолцоог халах том тэмцлийн өмнө зогсож байна. Тийм учраас амаргүй бэрх зорилт байгаа. Гэхдээ ард нь 180 мянган гишүүд жагсаж байхад ялагдана гэж байхгүй.

Ардчилсан намын ерөнхий нарийн бичгийн даргын үүрэг гүйцэтгэгч Л.Эрхэмбаяр: Амбийц, хувиа бодох нас биш

Нээлттэй нам болох шинэчлэлийг та бид бүгдээрээ эхлүүлж чадлаа. Одоо сэтгэлгээний шинэчлэл рүү явах цаг нь болсон. Бид Монгол Улсаа хөгжүүлэхийн төлөө зөв хүмүүжилтэй, зөв боловсролтой, хөдөлмөрийг танхин шүтдэг хүмүүсээ манлайлах ёстой юм. Цаашдаа сэтгэлгээний шинэчлэлийн төлөө явцгаая. Маш том хариуцлага үүрлээ шүү анд аа. Бид 50 нас гарчихлаа. Амбиц хувиа бодох юм байхгүй, эх орныхоо төлөө, иргэдийнхээ төлөө хамтдаа явцгаая.

Б.Сондор

zuv.mn