МИАТ-ийн маапаантай гэрээний зөрчилтэй санхүүгийн бүртгэлүүд

МИАТ ХК-иас дайны эрсдлийн даатгал нэрээр гадагш гаргасан их мөнгөний асуудал цагдаагийн байгууллагад шалгагдаж байна. Энэ мөнгийг зорчигчдын тийзний үнэн дээр 5 доллар нэмж хурааж эхэлснээс хойш орж ирсэн орлогыг МИАТ ХК нягтлан бодох бүртгэлийн хууль журмыг зөрчин өөр өөрөөр тусгаж иржээ. Тухайлбал, 2001-2002 оны даатгалын хураамжийн орлого 820 орчим сая төгрөгийг “Өглөг” дансанд хуримтлуулан бүртгэж байснаа жилийн эцэст “Хуримтлагдсан ашиг” дансанд хаасан байна. 2003 оны даатгалын хураамжийн орлого 700 орчим сая төгрөгийг “Өглөг”-өөр бүртгэснийг онгоцны даатгалын зардлыг бууруулах бичилт хийж хаасан байна. 2004 оны хураамж 650 орчим сая төгрөгийг мөн л даатгалын зардлыг бууруулах бичилт хийж, 420 гаруй сая төгрөгийг үйл ажиллагааны бус орлого гэж бүртгэлд тусгасан байх юм. 2005 оны орлого 1 тэрбум 300 сая орчим төгрөгийг мөн л үйл ажиллагааны бус орлогоор бүртгэсэн байна. 2006 оны санхүүгийн жилд хуримтлагдсан даатгалын хураамжийн орлого 1 тэрбум 310 орчим сая төгрөгийг өглөгөөр бүртгэж байснаа оны эцэст 1 тэрбум 150 сая төгрөгийг үйл ажиллагааны бус орлогоор залруулах бичилт хийсэн ажээ. Үүнээс хойших 2007, 2008, 2009, 2010 оны 10 тэрбум орчим төгрөгийг бүгдийг хураамжийн өглөгөөр бүртгэж байгаад оны эцэст үйл ажиллагааны бус орлогоор бүртгэлд тусгаж байжээ. Энэ хугацаанд олон аудит хийгдэж байсан ч нэг нь ч “МИАТ” ХК-д даатгалын орлогыг санхүүгийн бүртгэл, тайланд хэрхэн тусгах талаар чиглэл өгөөгүй байх юм.