“Apple’’-ийн шинэ утас гарахад зургаан хоног үлдлээ

Ухаалаг гар утасны “акул” “Apple” компанийн хэрэглэгчдээ гайхшруулах бас нэгэн шинэ загвар гарахад зургаан хоног үлдээд байна.

Энэ удаад ганц ч биш хэд хэдэн төрлийн шинэ загварын “iPad”, “IPhone” худалдаанд гарах учраас албан ёсны гэрээт дэлгүүрүүд ч гэсэн хүлээлттэй байгаа гэнэ.

Компанийн мэдээлж буйгаар ирэх мягмар гарагт шинэ загварын “iPhone”, нимгэн загвар бүхий “iPad”, “iPad mini’’-г танилцуулах билээ.

Тэгвэл шинэ загварын ухаалаг гар утаснууд танилцуулагдах сургаар тус компанийн хувьцаа өссөн байна. Тухайн үед “Apple” компанийн нэгж хувьцаа 456.8 ам.долларт хүрсэн бөгөөд нийт үнэлгээ 414 тэрбум ам.доллар болжээ.

Ингэснээр тус компани өнгөрсөн оны сүүлчээс алдсан хамгийн үнэтэй компани нэрээ эргүүлэн олж авахад хүрсэн юм. Шинжээчдийн мэдээлж буйгаар “Хэрвээ олонд танилцуулагдах шинэ загвар амжилттай болбол хувьцаа нь цаашид ч өсөх болно” гэв.

Б.Золзаяа